Die paartjie, wat op ’n plaas tussen Kuilsrivier en Stellenbosch in die Kaap woon, het jare gelede ontmoet by gemeenskaplike vriende en die koeël was amper dadelik deur die kerk.
“Dit klink dalk nou ’n bietjie weird, maar die oomblik toe ek vir Jo ontmoet wou ek haar storie hoor. Ek was definitief in awe. Ek het net so ’n gevoel gehad dat ons dalk deel van mekaar se storie sal raak,” verduidelik Tasché aan SARIE.com.
Jo-Lene vertel sy was op daardie stadium in ’n plek in haar lewe waar sy baie aan haarself gewerk en introspeksie gedoen het. “Ek het vir Tasché raakgesien, maar was nog nie reg vir ’n verhouding nie, alhoewel ek dadelik verantwoordelik gevoel het vir haar hart,” verduidelik sy.
Oor hul troue sê Tasché “Die dag gaan regtig so vinnig verby. Die dag daarna het ek gewens dat ek net tyd kon terugdraai en alles weer beleef. Legit, dit was die beste dag van my lewe!”
Nadat die paartjie die knoop deurgehaak het aan die begin van Junie vanjaar het hulle vir hul wittebrood na die Suid-Kaap gereis. “Dit was ’n fees! Ons het besluit om nie een dag vooruit te beplan nie en net rustig en in die oomblik te wees. Ons het net ge-chill en wakker geword met die branders wat breek,” vertel Tasché.
“Die dolfyne het elke oggend en laatmiddag by ons verby geswem. Hulle mission blykbaar vanaf Mosselbaai tot Knysna en terug elke dag. Jo sê dit het gevoel of ons in ’n ander land sit!”
