#SARIEvoorbladgesig is trots geborg deur Isa Carstens Akademie en INOAR

Wat is jou Kersfees-tradisie? 

My Kersfees-tradisie is ’n denne-Kersboom met bont liggies en versierings. As ek aan Kersfees dink, dan dink ek aan saamwees, die boodskap van Kersfees en die hele atmosfeer van die aand. Kersfees assosieer ek met gebakte beestong met mosterdsous, skaapboud, varkboud, kalkoen en ouma se gebakte aartappels om ’n groot tafel. Later jare het Kersfees vir my ook ’n ervaring geraak waar dit lekkerder is om te gee, as om te ontvang. 

Louisa van der Merwe FOTO Phyllis Green
Louisa van der Merwe FOTO Phyllis Green

Wat is jou Nuwejaarsvoorneme vir 2021?

Ek wil die lewe met oorgawe vier. Die lewe is ’n geskenk wat nie as vanselfsprekend aanvaar mag word nie. Dit is nooit te laat om die lewe te leer waardeer nie – koester elke oomblik. 

Wat het jy nuut geleer vandat jy jou Voorbladgesig-reis begin het? 

Behou ’n positiewe uitkyk op die lewe en fokus op dit wat jy nog wil bereik. Vermy mense wat negatief is en jou nie ondersteun in jou poging om positief te bly nie.

’n Bekende skrywer, Ruth E. Renkel, het gesê: “Jy lewe langer sodra jy besef dat die tyd wat jy bestee om ongelukkig te wees, verkwis word.”

Louisa van der Merwe FOTO Phyllis Green
Louisa van der Merwe FOTO Phyllis Green

Wat is jou boodskap aan jou jonger self?

Onthou, jy is ’n individu met ’n eie temperament en persoonlikheid. Jy leef nie net toevallig vandag in hierdie land of wêreld nie . . . jy het ’n doel op aarde. Maar om dit te kan verwesenlik moet jy eers jouself leer ken, vertrou en liefhê.

Raak ontslae van die maskers in jou lewe. Aanvaar jou foute en werk daaraan. Ontdek jouself en moet nooit moed opgee nie.

Louisa van der Merwe FOTO Phyllis Green
Louisa van der Merwe FOTO Phyllis Green

Wat beteken ’n salonbehandeling vir jou?

Dit is ’n noodsaaklikheid en lekker bederf! “Jy is genoeg” beteken ook dat jy genoeg omgee vir jouself en jouself versorg. Boonop streel ’n spa-behandeling al jou sintuie, laat jou ontspan en van alles om jou vergeet.

Watter verhouding het jy met jou hare?

My hare is baie fyn, dus kyk ek mooi daarna en gebruik goeie produkte. Ek het ’n uitstekende haarkapper in Potchefstroom. Ek en my jongste suster maak dit sommer deel van ’n heerlike kuier wanneer ons saam Potchefstroom toe ry vir ons haar-afspraak. 

Louisa van der Merwe FOTO Phyllis Green
Louisa van der Merwe FOTO Phyllis Green

Hoe bly jy positief oor die toekoms? 

In plaas daarvan om te fokus op die onsekerhede, of op die toekoms wat vir ons voorlê, moet jy kies om eerder jou geliefdes te omhels en koester. Fokus daarop op hulle lewens betekenisvol maak. Ek is dankbaar vir elke oomblik wat ek saam met my geliefdes kan wees.

Wat is jou gunsteling-aanhaling? 

Mahatma Gandhi het dit eenvoudig gestel: “Waar daar liefde is, is daar lewe.” Wanneer jy jou doel in die lewe vind, besef jy hoe kosbaar die lewe is. Jy kan dan jouself in ag neem en die lewe vier, omhels en waardeer. 

Die lewe is besig! Sukkel jy soms met balans?

Ek dink almal sukkel met balans. Besluit elke oggend hoe jy wil hê jou dag moet verloop en probeer om só jou dag in te kleur. Ek hou daarvan om te oefen, tyd in die natuur te spandeer en my dae te vul met blomme, kerse, heerlike kos, familie en vriende. 

Louisa van der Merwe FOTO Phyllis Green
Louisa van der Merwe FOTO Phyllis Green

Wat beteken SARIE vir jou?

Van kindsbeen af is SARIE deel van ons ma en susters se lewens. Vanaf die eerste Sarie Marais se voorblad met die gestreepte bloes – tot Simoné Nortmann op die November/Desember-uitgawe. 

Wat beteken Afrikaans vir jou? 

Ek het Afrikaans woordjie vir woordjie saam met my moedersmelk ingekry. Ek het haar gesig leer ken en liefkry toe my ogies nog net van haar bors tot by haar dierbare gesig kon fokus. My hart- en moedertaal, voorwaar! 

My mooiste woord in Afrikaans is “bojaan(tjie)”. Dit was my stiefpa se troetelnaam vir my moeder in die gelukkigste jare van haar lewe. Hy het hierdie “nuwe” Afrikaanse woord tot geregistreer by die Groot Afrikaanse Woordeboek en het ’n sertifikaat as bewys ontvang dat “bojaan” in die toekoms nou amptelik deel van ons ryk-groeiende Afrikaanse taal sal wees.