En in die kykNET-sepie Getroud met Rugby bring sy keer op keer nuwe dimensies tot haar komplekse karakter Kristien. SARIE.com het by haar ingeloer oor skoonheid, welwees en daai skuldgevoel, beter bekend as mom-guilt, wat soms ook kom kop uitsteek.

Hare

Baie vroue sê dat kort hare bevrydend is. Stem jy saam?

In baie kulture word ’n bos, lang hare beskou as ’n simbool van jeugdigheid, sensualiteit en vroulikheid. Toe ek die dag my hare kort sny, was ek gereed om uiteindelik vir myself in die spieël te kyk en te sê: “Jy ís al daai goed, en jy het nie lang hare nodig om dit te wees nie.” Ek dink ’n vrou se hare is ’n groot deel van haar identiteit en om op ’n plek te kon kom waar ek bereid was om daarvan te laat gaan, was vir my baie bevrydend.

In watter mate het die nuwe haarstyl jou selfversekerheid ’n soort hupstoot gegee?

Ek dink nie kort hare het selfversekering gebring nie, ek dink eerder selfversekering het gelei tot die besluit om my hare af te sny. ’n Reaksie wat ek baie gekry het in die aanloop tot die verandering was: ‘Jy het baie guts!’ En ja! Dit het my jare gevat om so gemaklik in my eie vel te wees dat ek so ’n groot deel van my identiteit in ’n poniestert kon afknip, en in ’n ziplock sakkie pos vir KANSA. Ek moet erken dit was ook vir my lekker om mense so ’n bietjie te skok en te laat besef dat ek in geen “voorafgestelde boksie” hoort nie. Om konstant te verander, is vir my ’n baie lekker en opwindende element wat my lewe gee.

Marlee was vir lank bekend vir haar lang swart hare en vol kuif. Die nuwe haarstyl gee haar nou ekstra woema, maar het beslis nie bygedra tot selfvertroue nie. Sy het reeds dit gehad! FOTO Instagram / Marlee van der Merwe
 Wat is jou grootste wenk vir vroue wat hul hare in ’n pixie-snit wil sny?

Soos met enige groot stap, dink ek jy moet ook deeglik jou huiswerk doen voordat jy ’n pixie kry. Soek eers vir snitte wat by jou gesig-vorm pas. Berei jouself voor op die verandering wat jy dalk in jou grimering en selfs klerekas sal moet aanbring om jou styl vars en elegant te hou. ’n Groot aanpassing vir my was ook om die nuwe hare te hanteer. Vra jou haarkapper vir ’n vinnige wenk of twee wanneer jy salon toe gaan!

LEES OOK: Soek jy pixie-styl? Volg dié wenke

Dink jy jou karakter, Kristien, benader ook die lewe ’n bietjie anderste sedert haar hare kort is?

Ek vind nou dat Kristien bietjie minder haar gewone smoke and mirrors benadering tot die lewe het. Sy is tans baie direk, en dra haar hart op haar mou. Sterk, maar ook heeltemal weerloos. 

Velsorg & grimering

Wat is jou drie grootste skoonheidswenke?

1.  Sonskerm is iets waarsonder ek nie my huis verlaat nie! 

2.  Balans! ’n Gesonde verhouding met jou eie lyf. Om te luister na wát jou liggaam en jou siel nodig het.

3. ’n Velsorgroetine eenvoudig genoeg om te kan volhou. Ek gebruik DrK derma health se reeks wat bestaan uit drie stappe en ’n SPF. 

FOTO Louis Daniel Botha
 Verkies jy ’n helder lip of dramatiese ooggrimering?

Ek verkies ’n helder lip met ’n subtiele oog.

Welwees

Jy is nie net ’n aktrise nie, maar ook ’n ma. Sukkel jy ook om tyd vir jouself te maak, sonder om ma-skuld te beleef? Indien ja, hoe bestuur jy daai gevoel?

Ek het al geleer dat ek ’n baie meer gelukkige ma is wanneer ek so nou en dan tyd maak vir myself. Maar ek maak ook seker dat ek 100% van my aandag, my hart en my tyd vir my kinders gee wanneer ek by hulle is. Dan is die ma-skuld bietjie minder. Ek dink egter ma-skuld gaan nooit heeltemal weg nie. 

Marlee is die trotse ma van twee kinders, Benjamin en Ross (foto). FOTO Instagram / Marlee van der Merwe

Wat is die een sê-ding waaraan jy altyd koester gedurende moeilike tye?

If it doesn’t challenge you, it wont change you.

LEES OOK: Veerkragtigheid - kan jy dit aanleer?