Dit was die gelukkigste dag van haar lewe. Om vir ’n “tweede” keer met haar Thomas – die een wat uit die bloute weer oor haar pad gekom het, wat haar laat veilig voel en toelaat om weerloos te wees. 

Hand aan hand terwyl die konfetti van roosblare gestrooi word. FOTO Michelle Bauermeister

Maar as sy terugdink, was daar talle oomblikke van groei en geluk. Die groot ou boom in haar ouerhuis se agterplaas was aktrise Christia Visser se speelplek. Daar kon sy vir ure swaai . . . pure kind. In ’n skuiling van takke gebou, dig sodat die lig net-net kon deurbreek, kon sy haar verbeelding vrye teuels gee, stories opmaak. En beter eindes gee. Een van hulle was van Barbie. “Ek het ’n storie op televisie gekyk waarin Barbie dans en skielik val. Almal het vir haar gelag en sy het huilend uitgehardloop.” 

’n Ruiker vir mev. Webb. Omdat die res van die blomme byna gestroop in eenvoud was, wou sy ’n tikkie drama in haar handruiker h . “Ek het gevra vir wit met donker kleure wat pop . . . ’n bietjie edgy maar steeds sag.” FOTO Michelle Bauermeister

Onder daardie boom het dieselfde toneel oor en oor uitgespeel, met Christia, toe net vier, wat Barbie’n tweede kans gee. “Ek het haar so jammer gekry, ek wou weet hoe sy voel. Vandag nog kan ek dit nie verduur as iemand verneder word nie. Dit breek my hart.” Dekades later leef sy haar steeds so in haar karakters se rolle in, soos dié van die sekswerker in die 2016-rolprent Tess, wat internasionaal uitgereik is. “Elke karakter dra ’n deel van my saam en ek van hulle. Ek moet hulle stuk-stuk probeer afskud en a? er.”Maar dis Tess wat haar steeds bybly. “My diepste ervaring was beslis met Tess. Sy het my tot breekpunt gedryf en ook die meeste groei gebring.”

Die aantreklike bruidegom. Thomas sê Christia het hom geleer die krag van liefde lê nie net in die prentjiemooi oomblikke nie. “Dis ook teenwoordig in die moeilike tye. Om lief te hê is om te groei, en dis wat ons wil doen,” sê hy. FOTO Michelle Bauermeister

Toe sy sewe jaar gelede as aktrise begin werk het, was Hollywood in haar agterkop. “Dis ’n sukses-maatstaf wat vir ons opgestel is, in die begin was dit beslis ’n mikpunt.” En nou? “Hoe langer ek in die bedryf is, hoe meer besef ek dat sukses vir almal verskillend lyk. Hollywood se leefstyl is eerlikwaar nie een wat my aanstaan nie. Maar sou ’n groot rol my pad kruis, sal ek nie nee sê nie . . . Ons almal is eintlik net op soek na geluk. Vir my is dit om te doen waarvoor ek lief is, om seker te maak ek doen dit om die regte redes, en om huis toe te kom, waar ek veilig voel.”

Vir Christia-hulle was troutradisies, soos ’n seremonie, toesprake en selfs foto’s met sonsondergang, belangrik. “Dit was ’n feesviering, presies soos wat ons dit wou hê.” FOTO Michelle Bauermeister

Christia glo alles gebeur op die regte tyd . . . iets wat sy by haar tegnikusman, Thomas Webb, geleer het. Sy ken hom al vandat sy sewe was en die gesinne was huisvriende in Swellendam voordat die Webbs Gauteng toe getrek en hulle kontak verloor het. “Ek het by hom geduld geleer. Geduld met myself en met ander. Ons almal is op ons eie journey, ons moet net toegelaat word om iewers langs die pad asem te skep.” 

En as sy kon, sou sy daai blinkoog-Christia van sewe jaar gelede aanraai om haarself net vroeër lief te hê. “Baie vinniger en baie meer . . . Ander se opinies is net dít, hul opinies.”

Die twee blommemeisies, Lia en Tali van Deventer, bewonder hul tannie se trourok. FOTO Michelle Bauermeister

In 2019 het sy haar eerste treë in die musiekwêreld gegee – nog ’n droom van haar kinderjare. Haar eerste enkelsnit en musiekvideo, “17 Shots”, is reeds 4,6 miljoen keer op YouTube gekyk. Die tweede een, “Die deur”, 2,2 miljoen keer. En haar jongste, “Wildste oomblik”, trek al by 921 000. Uga Carlini, bekroonde regisseur van die rolprent Alison (2016) waarin Christia die hoofrol vertolk het, het al drie se regie gedoen.

’n Feesmaal het op die 80 gaste gewag. Die voorgereg was ’n oestafel met vars brode, vrugte, biltong en ander happies. Vir die hoofgereg was daar ’n spitbraai met slaaie, soetpatat en baba-aartappels. Nagereg was mini-magnums. “Vir Thomas se liefde vir roomys en myne vir sjokolade.” FOTO Michelle Bauermeister
Die troue is gehou op Edendale, die plaas buite Bonnievale in die Wes-Kaap waar Christia se suster, Lucile van Deventer, en haar man, Gertjie, met vrugte boer. Die bruid het kaalvoet ingestap gekom met die Bailey Rushlow-weergawe van Shania Twain se “You’re Still the One” wat speel. “Die woorde vertel eintlik so mooi van my en Thomas se storie.” Hoekom kaalvoet? “Ek wou nog altyd met my voete plat op die aarde trou.” FOTO Michelle Bauermeister

Midde-in die grendeltyd verlede jaar het sy haar eerste vollengte album, Gemaklik verlore, uitgereik. “My musiek is ’n stukkie van myself wat ek in die wêreld in stoot, dinge wat my na aan die hart lê. Dis altyd vreesaanjaend, maar eintlik ook bevrydend.”

Blaaie uit ou boeke het as lopers op die tafels gedien, met net eenvoudige blommerangskikkings, blare en enkele kerse in swart kandelare om dit verder te versier. FOTO Michelle Bauermeister

Die liefdeslied “Kaal voor jou”, wat oor weerloosheid gaan, het sy vir Thomas geskryf. Hy sou dit op hul troudag die eerste keer hoor terwyl Christia in haar wit rok die paadjie afstap. Pure silwerdoek-oomblik! Maar Covid-19 het die troukar omgegooi en die troue is uitgestel. Toe nóg ’n Plan B: By kerslig in hul sitkamer met sushi op die spyskaart het sy dit vir hom gespeel.

Christia glo daarin om haar weerloos te stel. “Dis iets waarna ek streef. Weerloosheid beteken dat jy nie jou krake wegsteek nie. Ek dink dis so belangrik om my swakhede, vrese en letsels met die wêreld te deel, mense kan hulle daarmee vereenselwig. En dis ook hoe ek geleer het om te heal, ’n mens is nooit alleen in jou stryd nie.”

Kaalvoet bruid en haar bruidegom. FOTO Michelle Bauermeister

Sy sukkel met angs, bieg sy. Iets wat jou kan terughou as jy voor ’n gehoor moet sing. “Live shows bly maar nog ’n uitdaging. Tog is dit ook een van die dinge wat my regtig laat voel ek lewe.”

Dit was moeilik om op die ontwerp te besluit, maar uiteindelik het sy haar droomrok gekry. Elke detail op die Lena Lisa-skepping verteenwoordig Christia: Die kantafwerking van blare en takkies wat met die hand vasgewerk is, spreek tot haar as natuurmens, en die effense mou weerspieël haar liefde “vir vere en vryheid”. FOTO Michelle Bauermeister

En nee, ’n Afrikaanse album was nie net ’n strategiese besluit nie. Sy wóú in haar moedertaal sing. “Ek het soveel hoop vir die bedryf. Daar is baie wat nog ontdek moet word in die wêreld van Afrikaanse musiek.”

Sy skryf egter ook in Engels. “Ek hoop om in die toekoms ’n lekker balans tussen die twee te kan handhaaf.”

Vanjaar het Chloé Zhao maar die tweede vrou in die geskiedenis geword wat met die Oscar vir beste regisseur bekroon is, en rolprente soos Nomadland met sterk, komplekse vrouekarakters het die lig gesien.

Die bruid maak reg om vir ’n tweede keer “I do” te sê. FOTO Michelle Bauermeister

“Dis wonderlik dat vroue meer raakgesien word en erkenning kry, hulle verdien dit. Boonop gee dit meer vroue die selfvertroue om ook groter dinge aan te pak.”

Syself het al onder verskeie vroueregisseurs gewerk, soos Meg Rickards in Tess en Kaalgat Karel, wat later vanjaar uitgereik word, en Nina Swart in die kykNET-reekse Die Boekklub en Fynskrif. “Ek is dankbaar dat ek deel kan wees van ’n era wat gesonde verandering teweegbring.”

Maar mans verdien ook hul plek in die son. “Ek dink op sommige vlakke word dit te ver gevat. Mans het beslis ook ’n groot rol om te speel. Dit gaan als oor balans.”

Vreugde en vonkelwyn. Die pasgetroude Webbs saam met hul gevolg. Van links agter is Gertjie van Deventer, Lucile van Deventer, Estian Coetzee, Dane Smith, Liezl Franken en Johline Hunter. Van links voor by Christia en Thomas is Chantel van Schalkwyk, Emma-Minke Boonzaier en Megan Jonker. FOTO Michelle Bauermeister

En ten spyte van al die korrupsie, misdaad en geweld glo Christia nog in Suid-Afrika. “Ons is nie op ’n goeie plek nie, soos Francois van Coke sing, ‘Die wêreld is mal’ . . .”

. . . Kompleks en kwesbaar, mense wat oor mekaar val.

Maar sy het nog hoop, krake en al.

“Ek dink ons almal het. Kyk net om jou en jy sal sien daar is steeds goeie mense in die wêreld. Sáám kan ons ’n verskil maak. En ’n bietjie lig oor ’n donker wêreld gooi.”

Aktrise Amalia Uys en haar man, Shaun Golding, was deel van die vieringe. Agter hulle is die bekroonde akteur Brendon Daniels, wat saam met Christia in “Tess” gespeel het. FOTO Michelle Bauermeister

VERSKAFFERSLYS

TROUBEPLANNER: Lucile van Deventer (Christia se suster)

FOTOGRAAF: Michelle Bauermeister, bauermeisterweddings.com

DEKOR & BLOMME: Flamboijant (Bonnievale), flamboijant.co.za

VERBLYF: Ammara (private plaas by Robertson)

DRINKGOED: Stellar Organics, stellarorganics.co.za

WATER: CC Aqua (Robertson), ccaqua.hmw@outlook.com

TROUROK: Lena Lisa, lenalisa.com

TROUPAK: The Tux Tailor, thetuxtailor.com

GRIMERING: Chantel van Schalkwyk van CocoTella Makeup, cocotella9@gmail.com

HARE: Megan Sands Jonker van Country Roots (Swellendam), lmegansands@gmail.com

KOPSTUK & JUWELIERSWARE: Johline van Lille, Facebook/Johline van Lille Jewellery

LEERSTRIKDASSE: Weef, weefwear.com

MUSIEK & PLATEJOGGIE: Jared Prior (Botrivier), jaredpriorentertainment.business.site

Die paartjie se eerste dans was op The Darkness se “I Believe in a Thing Called Love”. Halfpad deur het Christia en Thomas saam begin karaoke. FOTO Michelle Bauermeister


SARIE is al vir dekades dié inspirasie vir bruide. Nou kan jy ander bruide inspireer met jou trourok, -produk of -diens. Of inspirasie vir jou droomtroue binne die SARIE-wêreld kry. Vir meer, gaan na SARIE Bruid: (ver)koop my rok & ander dienste.