Jy is sedert 2016 in die musiekbedryf en in 2020 het jy jou tweede album “Mooi” vrygestel. Wie is Julanie J as sy nie voor die mikrofoon staan nie?

Ek is ’n Afrikaanse meisie wat ’n groot passie het vir musiekmaak, om liedjies te skryf, vir kos en my mense. As ek nie ’n nuwe resep toets of self skep nie, sit ek voor my klavier en speel. Soms ontstaan daar ’n liedjie, ander kere is dit bloot net terapie.

Waar het jou liefde vir musiek vandaan gekom?

Musiek is my hele wese. Musiek kom van beide my ouers se families af. Aan my pa se kant is daar liedjieskrywers en musiekmakers. En aan my ma se kant het almal nog altyd gesing, glad nie professioneel nie, net bloot vir die liefde daarvan.

Is die lied “Arm” vir jou man, JP, geskryf? En is dit hoekom jy besluit het om hom in jou musiekvideo te gebruik?

Ja, hy het my gevra vir ’n liedjie. Ons verskil so baie van persoonlikheid tot kultuur. Maar nooit het ek gedink dat hierdie voelgoed-liedjie, spesiaal vir hom, orals sou gespeel word nie. En toe ons besluit om vir my ’n nuwe musiekvideo te skiet, het almal vir “Arm” gestem. Die pandemie se maatreëls het veroorsaak dat JP die perfekte keuse was. Maar ek dink nie hy sal sommer gou weer vir so iets ja sê nie. Hy verkies om agter die skerms te wees.

Jy het in 2020, te midde van die pandemie, n nuwe genre, popmusiek, gekies. Watter uitdagings hou dit in en tot watter mate het dit jou help groei?

Wel, dit was definitief nie maklik nie … ek kon nie met my nuwe musiek optree of toer nie. Jy raak skielik afhanklik van ander platforms om jou musiek daarbuite te kry. Tog, het dit my laat besef dat ek musiek nodig het! Al kom daar ook niks van dit af nie, kies ek dit steeds.

Wat het jou laat besluit om ’n nuwe genre te kies?

Ek wil eintlik net goeie musiek maak, mense laat goedvoel en hul bemoedig. So, as dit nou beteken ek moet jazz sing, dan doen ek dit ook! Ek jok ook nie vir jou as ek sê ek hou van alle musiek nie. 

SARIE se wekgroep, sedert 2020, is #JyIsGenoeg. Hoe voel jy oor die stelling en glo jy dit oor jouself? Of is dit steeds iets waarmee jy worstel?

Ek glo 100% daarin. Maar dis ook daai een ding wat ons almal mee sukkel. Ek dink ons onderskat heeltyd mekaar en onsself. Soms moet jy jouself herinner aan wát dit is jy waarin jy glo, want ons is eintlik méér as net genoeg.

Julanie J saam met haar man, JP, en hul vierpotige kind. FOTO Instagram / Julanie J

Verklap vir ons ... Waarvoor staan die J in Julanie J?

Baie mense noem my J, want Julanie word soms Melanie, Yolandi of selfs Jabulani. Eendag, voor ’n optrede, het ’n gasheer my per ongeluk voorgestel as Julanie J. Hy kon nie onthou of my verhoognaam Julanie of J was nie, en toe steek dit vas.

Watter sangers inspireer jou en hoekom?

Elton John! Sy musiek is tydloos, tot vandag toe sal sy lirieke my aanraak. Musiek wat hy dekades terug gemaak het, bly steeds relevant. Dieselfde geld vir Stevie Wonder! Hulle is my top-2-kunstenaars ... hulle is wie ek wil wees as ek groot is.

Watter sê-ding of aanhaling koester jy in moeilike tye?

Dis ’n ou een, maar ek glo dit: What must be, will be.

Hoe werk jou kreatiewe proses? Eers die lirieke en dan die melodie of wissel dit? 

Sjoe, dis altyd vir my ’n moeilike een, want ek skryf die heeltyd. Of ek nou bestuur, stort of by mense is, daar is die heeltyd musiek in my kop. Ek glo ook glad nie daaraan om ’n skryfsessie te beplan nie, as dit nie vanself kom nie soek ek dit nie.