300 jaar gelede vlug die Franse Hugenoot Jean le Roux na Suid-Afrika toe. Hy wou ’n nuwe lewe van vrede en vreugde vir homself en sy familie begin het. En ná 16 jaar se wag bekom hy uiteindelik ’n stuk grond tussen Kaapstad en Stellenbosch. Jean, soos die res van die Franse Hugenote, het die invloed op kos, boerdery, wynmaak en kookkuns vir ewig in Suid-Afrika kom verander. 

Nou, in 2021, bevind ons gunsteling-kaalkop Nataniël homself in sy voorvader se plaashuis. Dis hier waar sy nuwe kykNET-leefstylprogram Terwyl ek wag hoofsaaklik afspeel. Kos, kultuur, geskiedenis, vakmanskap en vermaak word verweef en verpak soos net Nataniël kan.

Terwyl ek wag mag miskien klink asof dit bloot net nog ’n kosprogram is, maar dit is veel meer en uiters gepas vir hierdie vreemde tye. Geskiedenis herhaal homself gereeld en op vele maniere,” sê Nataniël in ’n amptelike persverklaring.

Waaroor gaan dit? Elke episode het ’n tema en daar word op iets gewag en voorberei. Kykers leer deur die hele reeks by kenners, kunstenaars en vakmanne.

Oud en nuut. 

Ja, Nataniël herskep ’n wêreld én sommer ’n nuwe een ook! Boonop doen hy dit in indrukwekkende kostuums wat geïnspirer is deur die Franse Hugenote-drag en histories ontwerpe vanuit die 17de en vroeg 18de eeu. 

En wat is ’n Nataniël-program sonder musiek. Terwyl ek wag staan vir niks terug nie! Oorspronklike musiek, waarin Europese Jazz en klassieke rolprentmusiek van Frankryk verweef word, was spesiaal vir dié leefstylprogram geskryf. 

Die reeks van 13 episodes begin Maandag 4 Oktober om 20:00 op kykNET, DStv-Kanaal 144.