Sy het tien bundels essays in 40 jaar gepubliseer. Audrey het toenemend ook meer volbloed kortverhale geskryf. Daarvan is in haar volgende bundels saam met die essays gebundel.
Ter herdenking van Audrey se tagtigste verjaardag het Hennie Aucamp en Elize Botha ’n keur gemaak uit haar kortverhale en dit gepubliseer onder die titel Mal Hansie en ander verhale. Hierin kom veral die pyn van menswees aan die bod, waar Die rooi granaat dit het oor die onsekerheid by die bewuswording van liefde, Die laaste pruime die angs van skuldgevoelens uitbeeld en Die wind van die see af die onherbergsaamheid van die lewe. Mal Hansie het die skrik van die eerste aanraking met die dood as tema.
Dié bundel, Mal Hansie en ander verhale, is pas weer deur Protea Boekhuis heruitgegee met ’n spesiale inleiding deur Marié Heese, Audrey se dogter.Marie vertel dat die treffende omslagfoto gekies is, omdat "solank [sy] kan onthou het [haar] ma daagliks voor haar Remington gesit en tik." Oor haar ma se skryfwerk sê sy: "’n Mens sou kon sê, omdat sy onderhoudend skryf. Sy kan vrek snaaks wees. Sy is tot fyn selfspot in staat en huiwer nie om eerlik te vertel van moleste wat sy aangevang en oorgekom het nie. Sy skryf oor alledaagse ervarings, maar stel haar belewenisse so goed, so raak, dat elke leser voel, ja, dis net so, dis hoe ek dit ook beleef."
