#1
Jou grimering gaan die beste lyk as jou vel goed bevog is. Gebruik ’n vogroom wat maklik in die vel intrek voor jy grimeer word. Vermy gesigolies omdat dit jou grimering sal laat loop, volgens die skoonheidshuis Bobbi Brown se bruidgids, Bridal Beauty Make-up Tips & Beauty Tricks for the big day.
#2
Jou troudag is die een dag waarop jy nie´ ’n sonskerm moet aanwend nie. Dieselfde bestanddele wat die son se strale blokkeer, weerkaats ook die flitsligte van ’n kamera. Dit kan veroorsaak dat jy uitgewas op foto’s lyk.
#3
Onthou, neutrale en ligte lipstifffie-skakerings kan jou uitgewas laat lyk op foto’s. Kies helderder kleure soos pienk, roos- of pruimskakerings.
#4
Wees versigtig vir te veel of te min grimering. As jy te veel grimering aanwend, kan jou familie, vriende en bruidegom dalk begin wonder wie die vreemdeling is. Maar dra jy te min grimering, kan jy vaal op foto’s lyk.
#5
En rooi lipstiffie? As jy gemaklik is daarmee en dit pas by jou persoonlikheid, is rooi lipstiffie ’n goeie keuse. Maar onthou, jou troudag is nie die tyd om met iets te eksperimenteer wat jy nie gewoonlik sal dra nie.
#6
Die twee produkte wat die vinnigste van jou gesig verdwyn, is lipstiffie en blosser. Hou dit by jou op jou troudag ingeval jy dit nodig kry.
#7
As jy jou grimering wil opknap nadat jy ’n traan of twee gestort het, druk die trane liggies droog met ’n sneesdoekie – moenie vee nie! Gebruik dan ’n verligter-pen onder jou oë om die vel hier te bedek.
#8
’n Bruid se oë moet die fokus van haar grimering wees. Gebruik sagte natuurlike kleure met ’n tikkie metaalglans om dit te beklemtoon.
#9
As jy met minimale grimering op jou troudag wil wegkom, is baie maskara, rooskleurige wange en ’n lipglans in ’n neutrale skakering die geheim. Jy sal steeds sprankelend en herkenbaar op die foto’s lyk.
#10
As ’n grimeerkunstenaar jou gaan grimeer, is dit altyd beter om eers ’n proeflopie te doen om seker te maak dat jou vel nie sensitief vir enige van die produkte is nie. Dis ’n goeie idee om jou eie onderlaag en maskara saam te neem.
Teken in en kry onbeperkte toegang tot 11 Afrikaanse tydskrifte en 35 koerante. Alles op een plek.
KIES JOU PAKKET
