Begroting. Dis seker die een woord wat meeste bruide ’n enorme hoofpyn gee. Gelukkig is dit om op ’n streng begroting steeds jou droomtroue te hê. SARIE.com gesels met top-troudiensverskaffers om uit te vind hoe jy kostes op jou groot dag kan sny, sonder om jou visie te benadeel.

Wenk 1: Vinnige etes lei tot meer pret

Fotograaf Rozier van Tonder van Okay Deer reken dat minder eetgoed sorg vir meer fototyd én meer pret op die dansbaan. “As die venue dit toelaat om spyseniering van buite af te gebruik, gee vir jou gaste burgers of pizza. Dis goedkoop, ongelooflik lekker, dek vegetariese behoeftes en kan vinnig geëet word. Dis die moeite werd om te sny op jou spyseniering, want as fotograaf het ek ondervind dat baie tyd verlore gaan terwyl gaste eet wat beter of meer kreatief gespandeer kan word om jou troue onthoubaar te maak.” In ’n neutedop kies slim en eet steeds lekker.

View this post on Instagram

A post shared by PERSEPHONE | Wedding Inspo ? (@bridal_vogue) on

Wenk 2: Eenvoud en styl 

Retha Kruger van Bederf Proteas glo eenvoud en styl gaan hand-aan-hand. Groot blomme soos proteas kan op hul eie staan en steeds ’n stelling maak. “Een groot koningsprotea as handruiker of as enkele fokuspunt op ’n tafel lyk ongelooflik mooi. Jy kan ’n  stylvolle, tydlose prentjie skep, sonder om jou begroting te laat bloei.”

Wenk 3: Een verskaffer, baie dienste

Probeer kostes beperk deur soveel dienste vanaf een verskaffer te huur, beveel Margaux van den Berg van Blank Canvas Event Design aan. “As jy wel met ’n begroting werk, vind ’n verskaffer wat die wydste verskeidenheid items en dienste vir jou sal kan bied.” 

Wenk 4: Fokus op wat belangrik is

Jenni Herselman van Jenni Elizabeth Photography glo egter nie daarin om jou begroting te sny wanneer dit by die dienste kom wat vir jou die belangrikste is nie. “Kies een of twee elemente van jou troue wat vir jou die heel belangrikste is, soos kos en musiek. Kry dan die beste verskaffer wat jou begroting toelaat vir daardie een of twee dienste. Vir die res kan jy eerder meer bekostigbare verskaffers kry of van die aspekte sommer self behartig deur die hulp van vriende en familie aan te vra.” 

Wenk 5: Sê nee vir ’n nuwe rok!

Nog een van Jenni se wenke: Jy hoef nie in ’n splinternuwe rok te trou nie. “Voor jy duisende rande op ’n trourok spandeer, kyk gerus eers op die tweedehandse mark, jy kry dalk net jou droomrok vir spotgoedkoop. Dis hoe ek my trourok gekry het en dit het my baie geld gespaar.”

- Vind jou droomrok vandag nog op 'SARIE Bruid: (ver)koop my rok & ander dienste', waar pryse wissel tussen R6 000 en R40 000! Daar is beslis ’n rok vir elke smaak.