Die lob (of lang bob) was in 2018 supergewild. Dit pas enige gesigvorm én lyk mooi by oud en jonk. Boonop is dit ’n veelsydige styl wat jy maklik kan stileer. Die haarstyl kan stompgesny of in effense lyers gedra word.

Die gewilde haarstyl kry nou ’n vars kinkel danksy die “kitten”-kuif. “Dié korter kuif wat effens versnipper is, het ’n 90’s-gevoel en is jonk, vars en effens parmantig. Dit maak jou gesig onmiddellik oop en is een van die maklikste maniere om nuwe lewe in jou haarstyl te blaas,” sê Boyd Meilhon, meesterstilis by die haarsalon Karo Hair in Johannesburg.

FOTO: Getty Images / Gallo Images

As jy bang is dat jou kuif te veel stilering gaan verg, wees gerus, jou haarstileerder sal jou haartekstuur, hetsy fyn en reguit of krullerig, in ag neem en dan jou stomp haarpunte en kuif só sny dat minimale stilering nodig is.

Wenk
’n Kort kuif met tekstuur beklemtoon jou gesigvorm en lyk daarom beter by ’n lang of ovaalvormige gesig. Vermy dit eerder as jy ’n ronde, vierkantige of hartvormige gesigvorm het.

Versorging:

Wanneer jy ’n kuif laat sny, neem dit dikwels ’n tydjie vir jou hare om gewoond te raak om se te val. Gebruik ’n bevogtigende sjampoe en opknapper om kroeserigheid te keer. Kam dan net nadat jy jou hare gewas het jou nuwe kuif reguit uit en blaas droog. Mettertyd sal jou kuif vanself mooi droog word. Rond die styl af met ’n glanssproei om fyn haartjies wat opstaan te tem. En moenie van ’n droë sjampoe vergeet nie! Dit werk in ’n kits om olierigheid op jou kuif te absorbeer en tekstuur te skep.

Probeer die produkte:

1. Hask Cactus Water Weightless Moisture Shampoo en Conditioner (R150 elk). By Clicks.

2. TRESemmé Translucent & Shine Dry Shampoo (R85)

3. Sorbet Drybar Full Sheen Ahead Keratin Oil (R60). By Sorbet Dry Bar-salonne en Clicks.