Ons gesels met Greta oor sjokolade, haar tyd op die program én haar besoek na België. 

KOS
Die aktrise, Greta Pieteren. FOTO VIA

1. Is jy 'n sjokoladeliefhebber?

Oor die algemeen nie eintlik nie, maar as die craving my eenkeer in 'n bloumaan beetkry, hou ek nie terug nie.

2. Wat is jou gunsteling sjokoladegereg?

Niks kom by 'n klassieke brownie en roomys nie.

3. België is die land van sjokolade. Het jy al België besoek?

Ek was gelukkig genoeg om in 2005 daar 'n draai te maak en dis waar wat hulle sê, die sjokolade is uit die boonste rakke. My gunsteling-bederf was Belgiese pannekoek gevul met marzipan en warm sjokoladesous.

4. Wat was vir jou die lekkerste oomblik op die program? Het jy iets nuuts by Herman geleer?

Wat Herman so uniek maak is hoe toeganklik hy is as 'n koskenner. En om tyd saam met hom in die kombuis deur te bring laat 'n mens voel asof jy tot enigiets instaat is. Een van my hoogtepunte op die program was die springmielie-koek, wat 'n fabulous kombinasie.

5. Watse drie bestanddele het jy altyd in jou yskas/koskas?

Sojasous, hummus en bloubessies.

Blitsvrae met Greta

Lindt of Ferrero Rocher? Ferrero Rocher

Sal jy eerder Willy Wonka se Sjokoladefabriek wil besoek of Wonderland? Wonderland

Sjokolade of springmielies? Sjokolade

Berge of see? Dis 'n strikvraag.

Jou gunstelingfliek? Op die oomblik La cage aux folles

Resep uit Via-episode

Fees van sjokolade

Sjokolade-en-springmielietert

KOS
FOTO VIA

As daar iets is wat jou hart kan steel, is dit die kombinasie van sjokolade en springmielies. Wie kan nee sê hiervoor!

Lewer 1 tert

  • 30 ml sonneblomolie
  • 115 g springmieliepitte
  • varsgemaalde seesout
  • 200 g klapperkoekies (Tennis biscuits), fyngemaak
  • 100 g botter, gesmelt
  • 200 g donker sjokolade, fyngekap
  • 180 ml room
  • 40 g botter

1. Plaas die olie en pitte in groot mikrogolfbak met ’n deksel. Plaas op hoog in die mikrogolf en laat die pitte spring. Verwyder uit die mikrogolf en geur die mielies goed met seesout.

2. Meng die koekiekrummels en gesmelte botter saam tot die tekstuur van klam seesand. Spuit ’n losboom-tertpan van 20 cm goed met kossproei. Voer die pan uit met krummels.

3. Plaas die sjokolade, room en 40 g botter in ’n glasbak en mikrogolf op hoog vir 5 minute – roer elke 2 minute tot gesmelt. Gooi dit in die uitgevoerde pan en smeer gelyk.

4. Pak springmielies bo-op en laat stol 2 uur of oornag in die yskas. Haal uit die pan en sit voor.

Kry die episode se volledige resepte op VIA se amptelike blad - klik hier.