Verhit oond tot 180 °C. Verhit ’n bietjie olyfolie in ’n groot oondvaste pot tot warm. Voeg uie, knoffel en lamskenkels by en braai 2-3 minute of tot vleis mooi bruin is. Voeg komyn en vinkel by en braai nog 1 minuut. Voeg tamatie en 500 ml water by. Geur goed met sout en peper. Maak pot toe met deksel en plaas in warm oond. Laat stadig stowe vir 1 uur. Maak pot oop, voeg aartappels by en bak oop vir nog 30 minute of tot lam en aartappels sag is – as die vloeistof in die pot min lyk, gooi nog water by. Sit voor met stysel van jou keuse.
