Styl, dis iets wat geld nie kan koop nie. Om stylvol te wees beteken nie jy dra die nuutste tendense en koop net luukse handelsmerke nie. Dit gaan veel eerder daaroor om jouself te stileer om goed versorgd en nie slonsig te lyk nie. Tendense kom en gaan, die nuutste modes is in ’n oogwink verby, maar jou persoonlike styl bly vir ewig.

Indien jy nog sukkel om jou styl-voete te vind, is hier nege geheime wat die SARIE-modespan en vier stylvolle vroue, Melania Trump, Meghan Markle, Kate Middleton en Amal Clooney, kan deel.

Stylvol in ’n oogwink:

1. Maak seker jou klere pas

Moenie klere koop wat jou nie pas nie, net sodat jy jou in ’n kleiner nommer moet inwurm of die item soos ’n sak aan jou hang nie. Jy mors net geld en boonop lyk dit slordig.

ONTHOU: As jy ’n hemp koop, maak seker die knope gaan maklik toe, veral oor jou borste. ’n Jas en baadjie moet jy aanpas met iets onderaan en kyk of die knope steeds toemaak. Om soos ’n opgestopte wors te lyk is nie vleiend nie.

FOTO Getty Images Gallo Images
FOTO Getty Images Gallo Images

2. Kwaliteit bo kwantiteit

Pleks van rye klere in jou kas, belê eerder in een goeie jas, een goeie leerbaadjie, ’n paar jeans, ’n paar stewels en ’n wit hemp. Dis ’n belegging en sal jou ’n leeftyd hou. As jy nie ’n leerbaadjie kan bekostig nie, koop ’n kunsleerbaadjie, maar maak seker die materiaal blink nie te veel nie. Spandeer eerder geld op sulke items as wat jy baie geld betaal vir ’n trend wat net een seisoen gaan hou.

FOTO Getty Images Gallo Images
FOTO Getty Images Gallo Images

3. Wees op jou gemak

Daar is niks so onaantreklik soos ’n vrou wat ongemaklik in haar uitrusting lyk nie, jy moet dit met selfvertroue kan dra. Selfvertroue is die sleutel tot ’n stylvolle voorkoms. Indien jy die heeltyd jou rok moet aftrek of broek moet optrek of voel jy wil sit omdat jou skoene jou knyp, weet jy die uitrusting werk nie. Moenie hakskoene dra as jy nie daarin kan loop nie, daar is baie alternatiewe skoene wat net so mooi lyk. 

FOTO Getty Images Gallo Images
FOTO Getty Images Gallo Images

4. Gooi weg

Klere wat stukkend is, nie meer pas nie, skoene wat deurgeloop is, wit items wat nie meer wit is nie en swart items wat verbleik is, hoort nie in jou kas nie, gee dit weg!  

WENK: Indien dit nie meer wit is nie, was dit met ’n bietjie wit asyn. 

FOTO Getty Images Gallo Images
FOTO Getty Images Gallo Images

5. Dra lipstiffie

Om jou lippe in te kleur kikker jou uitrusting dadelik op. Dis die magic van enige uitrusting.

FOTO Getty Images Gallo Images
FOTO Getty Images Gallo Images

6. Versorg jou naels

Nee, dis nie ’n onnodige Emsie Schoeman-etiketles nie. Naels met naellak wat afdop lyk slordig. Dit gaan jou stylvolle uitrusting onmiddellik bederf. 

FOTO Getty Images Gallo Images
FOTO Getty Images Gallo Images

7. Stryk jou klere

As jy nie lus is om die strykyster uit te haal nie, stoom jou klere oor die ketel, hang dit in die stort op of gebruik jou haartang om klein areas soos die kraag van jou hemp te stryk. Maar ’n gekreukelde item laat jou verslons lyk.

FOTO Getty Images Gallo Images
FOTO Getty Images Gallo Images

8. Maak jou skoene skoon

Net soos jy jou klere moet was, moet jy jou skoene ook skoonmaak. ’n Blink skoen is immers ’n mooi skoen!

FOTO Getty Images Gallo Images
FOTO Getty Images Gallo Images

9. Onderklere moet pas

Jy dink nie mense kan dit sien nie, maar ’n bra wat oopvou of jou druk is opsigtelik. Stukkende onderklere is ook taboe!

FOTO Getty Images Gallo Images
FOTO Getty Images Gallo Images