Haar ma, Emari Gieselbach, was die tiende wenner van SARIE se Voorbladgesigkompetisie. Andria het per e-pos vir SARIE Boekeredakteur, Phyllis Green, meer vertel oor haar groot liefde vir lees.

 inspirasie, woorde
Andria Gieselbach Foto: Emari Gieselbach
 inspirasie, woorde
Andria en Emari Gieselbach Foto: Lizbe Botha

"My eerste boek was Tippie. Dit is deur Jose Palmer geskryf en in Afrikaans vertaal deur Reinette Lombaard. Ek hou van lees, omdat ek my kreatiwteit so kan ontwikkel. Ek kan maak of dit ’n film is en dan maak ek of ek in die boek se wêreld lewe. Ek het ook baie gelees tydens die grendeltydperk.

Ek hou van dagboek-verhale of ’n storie met ’n avontuur in. Boeke soos Lotta se Lewe deur Alice Pantermüller (vertaal in Afrikaans deur Kobus Geldenhuys) is van my gunstelingstories. Ek het al die hele reeks gelees.

My ander gunstelingskrywer wat altyd avontuurboeke skryf, is Jaco Jacobs. Ek was veral bly dat hy Nimmermeer en Wondersmid wat deur Jessica Townsend geskryf is in Afrikaans vertaal het."

 inspirasie, woorde

Lees hieronder Andria Gieselbach se resensie oor Nimmermeer (Human & Rousseau, R240)

Die verhaal gaan oor ’n meisie, Morrigan Crow, wat bestem was om op haar elfde verjaarsdag te sterf omdat sy vervloek is. Maar op daai aand het ’n man, Jupiter Noord, haar lewe gered van Die Nag van Rook en Skadu. Die Nag van Rook en Skadu is jagters wat op perde ry en vir Morrigan wou vang. Jupiter het haar na die geheime stad van Nimmermeer gevat.

Hy wou haar laat aansluit by Wondergenootskap, ’n skool vir kinders. Maar eers moes sy ’n klomp uitdagings aanvaar. Sy moes die toetse slaag om in die skool in te kom. Sy het ’n nuwe maat gemaak en sy het ingekom in Wondergenootskap, maar nou kom die verrassing. Jupiter het sy spesiale kragte gebruik om Morrigan in te kry. Toe voel Morrigan sy het nie ’n talent nie. Of het sy?

Dit was ’n lekker storie. Wat my laat aanhou lees het, was my opgewondenheid en nuuskierigheid wat net geborrel het. Ek wou weet wat volgende gebeur.  - Andria Gieselbach