Die Griekse wysgeer Sokrates het gesê dit is wys dat ’n man trou. “As jy ’n goeie vrou trou, sal jy gelukkig wees. Trou jy ’n slegte een, sal jy ’n filosoof word ...”
“’n Goeie wegspringplek is om régtig van mekaar te hou,” meen die akteur Tom Hanks, wat al 31 jaar met Rita Wilson getroud is. Hulle is glo nog net so verlief soos toe hulle op die ABC-sitkom Bosom Buddies ontmoet het.
Maar al hoe minder mense is gretig om ewige trou aan mekaar te sweer en al hoe meer mense skei. Inderdaad ’n donker prentjie wat voorgehou word deur Statistieke SA.
