Dulcie Weyks, Finansiële Adviseur, PSG Wealth Pretoria Irene Sovereign Drive FOTO'S Unsplash & Verskaf

Die lewe, soos hulle sê, begin op 40. Nou is waarskynlik ’n goeie tyd om seker te maak jou geld werk vir jou – instede daarvan dat jy net werk vir geld.  

Kom ons wees eerlik – meeste van ons droom daarvan om meer geld te hê. Maar doen jy werklik iets om hierdie droom te realiseer? Een van die maklikste maniere om hierdie en ander finansiële doelwitte te bereik, is deur jou geld te belê. 

Jy het dalk nie geweet dat dit ’n welbekende feit in die finansiële wêreld is dat ons vrouens minder spaar as mans nie. Beleggings, fondse, groei en risiko is groot woorde vir baie vrouens en hulle vermy die onderwerp tot hul eie nadeel. Dit is dus nie ’n verrassing dat vrouens met baie minder geld aftree as mans nie, al leef ons ses tot agt jaar langer.

Vandag se vroue is meer opgelei, bekwaam en bemagtig as ooit tevore. Maar wanneer dit kom by die belê en bestuur van ons geld, voel dit of ons steeds in die verlede vasgevang is. 

’n Onlangse studie toon dat 58% van getroude vroue beleggings- en langtermyn besluite oor finansiële beplanning aan hul mans oorlaat. Slegs 23% vroue wêreldwyd neem beheer oor hul eie langtermyn finansiële beplanning en besluite.* Dus moet vroue leer om verantwoordelikheid te neem vir hul eie finansiële sekuriteit. Die goeie nuus is: om te belê is nie so erg nie, en jy hoef nie veel te weet oor die aandelemark om goeie beleggings te maak nie. Ek deel graag ’n paar basiese beleggingswenke om jou beleggings in jou 40’s te verryk.  

1. Raak “geld-slim”

Om jou geld in ’n spaarrekening te hou kan jou duur te staan kom. Ons dink dis ’n “veilige” ding om te doen omdat ons nooit die rekening se saldo sien daal nie.  

Maar daar is ’n risiko! INFLASIE. Deur skaars tred te hou met inflasie, groei jou geld nie genoeg om die koopkrag daarvan oor die langer termyn te beskerm nie.  

Om jou geld in ’n spaarrekening te plaas, klink dalk na die maklikste opsie, maar onthou dat die maklikste opsie nie noodwendig die beste resultate lewer nie. Kom ons kyk na die verskillende uitkomste wat jy kan verwag sou jy jou geld in  ’n spaarrekening, vaste deposito of aandele-gekoppelde belegging spaar:

Gestel jy belê R100 000 vir 10 jaar:

Bron: PSG Wealth *Voorbeeld laat enige effek van belasting buite rekening

Natuurlik, in laasgenoemde twee voorbeelde, loop jy die risiko om geld te verloor. Onthou egter dat beleggings ’n langtermyn spel is.  Die goeie nuus hier is dat die beloning histories die risiko werd was.

2. Raak ernstig oor jou aftrede

Het jy geweet dat jy teen jou 40ste verjaardag drie maal jou jaarlikse inkomste moes gespaar het? Indien jy op koers is, wel gedaan! Nou is dalk ’n goeie tyd vir jou om seker te maak jou beleggingsportefeulje is dinamies gestruktureer om jou groei in die volgende paar jaar ’n ekstra hupstoot te gee. As jy tot dusver uitgestel het om te spaar vir jou oudag, kan jy dit nie verder uitstel nie. Dit is nou of nooit! 

Die realiteit is dat jy halfpad is sedert jy die werksmag betree het en die tradisionele aftree ouderdom (65). Jy is ook in die tydperk van jou lewe waar jou inkomste waarskynlik ‘n piek sal bereik. Die volgende voorbeeld toon die uitwerking op jou uitkeerbedrag indien jy 10 jaar uitstel voordat jy begin spaar:

Gestel jy besluit om R5 000 per maand te spaar:

Bron: PSG Wealth

Aftreefondse bied jou die geleentheid om te spaar vir jou aftrede, hetsy jy nou ’n lid is van jou werkgewer se pensioen- of voorsorgfonds en of jy spaar in jou persoonlik uittree-annuïteit.  Bydraes tot ’n aftreefonds kan jou ook help om minder belasting te betaal. Huidige wetgewing laat jou toe om bydraes van 27.5 % van jou besoldiging/belasbare inkomste (beperk tot R350 000) af te trek van jou belasbare inkomste.  

Laastens is dit belangrik om dissipline aan die dag lê en nie onnodige kontant onttrekkings te maak uit jou pensioen- of voorsorgfonds wanneer jy van werk verander nie.  Nie alleen het dit negatiewe belasting implikasies nie, maar verder is dit baie moeilik om die verlies in groei op te maak. Dit is moontlik vir jou om jou aftreefonds tydens bedanking in die bestaande fonds belê te hou, oor te dra na jou nuwe aftreefonds of om die kapitaal oor te dra na ’n bewaringsfonds.

3. Dink aan jou lang- en korttermyn doelstellings

Vra jouself af, waarvoor belê ek? Noudat jy begin dink aan spaar vir aftrede, oorweeg jou ander finansiële doelwitte.  

Het jy ’n korttermyn noodfonds? As daar nou een ding is wat ons kan leer uit die huidige COVID-19 pandemie, is dit die waarde daarvan om 6 maande se inkomste te spaar vir onverwagse uitgawes. 

Maak 'n lys van wat jy in die volgende 5 en 10 jaar vir jou lewe wil hê. Is dit ’n studiefonds vir die kinders, of moontlik ’n droomvakansie in die Switserse Alpe?

4. Jy hoef dit nie alleen te doen nie

’n Finansiële adviseur is nie net vir welgestelde mense nie. Daar is ’n magdomprodukte en fondse beskikbaar wat enige hooggeleerde persoon kan intimideer. Moenie skaam wees nie: neem beheer van jou finansies en soek ’n gekwalifiseerde finansiële adviseur waarmee jy gemaklik voel.  

Onthou egter, finansiële beplanning is ’n reis, nie net ’n eenmalige oefening nie.  

Moenie verder wag nie. Laat jou geld vir jou werk!

Soek jy raad met geldsake? Stuur vir ons ’n boodskap op Facebook of kontak PSG vir professionele en persoonlike advies.

Volg vir PSG Wealth op Facebook en Twitter

*UBS Global Wealth Management Survey