Vanessa Alberts
Vanessa Alberts

Die kanse is goed dat jy in jou dertigs reeds ’n stabiele werk en vaste inkomste het. Hoe bly jy geldslim, laat jou geld groei én geniet steeds die lewe?

1. Begin met die einde in sig 

Stel reeds van vroeg af finansiële doelwitte vir die kort en lang termyn. Kom in die gewoonte om ’n maandelikse begroting op te stel. Maar hersien ook aan die einde van die maand jou finansies: Waar het jy onnodig geld uitgegee? Waar kan jy dalk meer sny? Hierdie gewoonte sal verseker dat jy by jou voorgestelde begroting hou en verantwoordelik bly.

ONTHOU: Moenie wag om te kyk of daar inkomste oor is aan die einde van die maand nie. Probeer eerder om doelbewus elke maand 10% van jou inkomste weg te sit. 

2. Verhogings: Uitgawes volg inkomste

Daar is ook die vooruitsig van verhogings en bevorderings wat kan lei tot ’n groei in inkomste. Indien jy hierdie ekstra inkomste korrek allokeer, kan dit ’n groot verskil maak aan hoe gemaklik jy eendag kan aftree. Ek sien te veel mense wat nie genoeg vir aftrede gespaar het nie en wat dan laat in hul loopbaan skielik aggressief moet begin spaar om genoeg fondse vir aftrede beskikbaar te hê.   

Uitgawes volg inkomste. Soos wat jou inkomste verhoog, is dit só maklik om ’n duurder lewenstyl te begin handhaaf, wat meer finansiële verpligtinge teweeg bring. Voor jy jou oë uitvee, kan jy nie dink hoe jy sonder die ekstra inkomste jou uitgawes kon betaal nie. Die groot geheim? Moenie in hierdie slaggat trap nie. 

Ja, gaan vier jou verhoging, maar bly steeds by jou bestaande begroting. Jy het nou die goue geleentheid om die ekstra kapitaal slim aan te wend: Betaal jou skuld vinniger af of spaar selfs vir jou kinders se tersiêre opleiding. Indien jy dit kan regkry om jou skuld vinniger af te betaal of om selfs geld te begin spaar, is jy reeds ver voor jou vriend wat pas ’n nuwe motor aangeskaf het of haar lewenstyl verhoog het. 

3. Jy kry goeie en slegte skuld

Goeie skuld kan iets wees soos om eiendom te koop, maar probeer om áltyd die skuld vinniger af te los as die oorspronklike termyn. Slegte skuld is ’n klererekening of kredietkaart wat baie hoë maandelikse rente dra en jou salaris kan opeet, nog voor jy daarmee kon begin leef het. Probeer om jou skuld te beperk.

ONTHOU: Probeer eerder met ’n kleiner, afbetaalde eiendom te sit, as ’n groot eiendom wat maandeliks jou begroting oorheers. Jy moet probeer om voor aftrede al jou skuld af te los. 

4. Die ABC van beleggings

Daar is verskeie beleggingsprodukte wat jy kan aanwend om te begin spaar. Om belastingslim te wees, kan jy kyk na ’n belastingvrye belegging of ook na ’n moontlikheid om by te dra tot ’n uittree-annuïteit.

ONTHOU: Elkeen van hierdie beleggingsopsies het hul eie reëls ten opsigte van onttrekking. Daar kan ook beperkings op die jaarlikse bydraes wees.

Jy kan ook ’n effektetrust-belegging kies. Dis ’n koste-effektiewe beleggingsvoertuig wat jou vryheid en buigsaamheid bied indien jou omstandighede verander. 

Jy hoef nie te wag tot jy ’n (groot) enkelbedrag bymekaar gemaak het nie. Jy kan eerder op ’n maandelikse wyse begin spaar, wat dan die voordeel het dat jy ’n gelykmatige toedeling kry tot die beurs, indien jy in fondse belê waar daar aandeelblootstelling tot beide binne- en buitelandse aandele is.

ONTHOU: Daar is verskillende bateklasse: Aandele, effekte, eiendom en kontant. Dit is belangrik om te verseker dat jou portefeulje goed gediversifiseer is uit ’n kombinasie hiervan.

’n Voorbeeld: Indien jy begin om maandeliks ongeveer R2 500 te spaar en hierdie bedrag jaarliks met 5% verhoog, kan jy oor ’n tydperk van 10 jaar R500 000 bymekaar maak – dis nou indien jy ’n gemiddelde opbrengs van 9% op jou kapitaal verdien.

5. Die grootste geheim as dit kom by spaar

Die krag van saamgestelde rente: Hoe vinniger jy begin om kapitaal weg te sit, hoe langer het daardie kapitaal tyd om te groei. Elke jaar sal jy ook groei op die vorige jaar se groei ontvang. Op hierdie manier kom jy voor met jou langtermyn-beleggingsplanne en kan jy jou doelwitte bereik. 

6. Leer jou kinders van vroegs af die waarde van geld

Ons leef in ’n era waar kontant nie meer algemeen gebruik word nie. Skole se snoepwinkels gebruik deesdae verskillende kontantlose metodes en ontneem eintlik kinders die geleentheid om onderskeid te kan tref tussen behoeftes en die koste daarvan. Kinders sien slegs hoe ’n kaart alles betaal. Gee vir jou kinders sakgeld en help hulle om te beplan vir die aankoop van iets waarvoor hulle kan spaar. Moet egter nie hierdie doelwitte te ver in die toekoms maak nie, want dan sal hulle belangstelling verloor nog voor die les geleer is. 

7. Finansiële kommunikasie in die huwelik is uiters belangrik 

Beplan en droom saam. Gaan sien saam ’n finansiële adviseur en wees ingelig oor watter beleggingsmoontlikhede bestaan en wat die beste sal wees vir jul doelwit. Dit kan jul verhouding versterk en verseker dat julle tot ’n gesamentlike doelwit werk. 

Indien jy die regte finansiële besluite neem in jou dertigs en noodsaaklike finansiële dissipline aanleer, sal jy maklik jou aftree-doelwit bereik en vroeg finansieel onafhanklik kan wees. 

Soek jy raad met geldsake? Stuur vir ons ’n boodskap op Facebook of kontak PSG vir professionele en persoonlike advies.

Volg vir PSG Wealth op Facebook en Twitter