Die e-pos van Penguin-uitgewers wat vroeg in lockdown in sy inboks ge-“pieng” het, was bedrieglik eenvoudig: Is jy bereid om ’n boek oor sakeredding te skryf? Maar skrywer Douglas Kruger het dadelik besef dit sou “’n stewige klim bergop verg, dalk selfs ’n bergwedloop!” Hy het diep asemgeskep, ’n skietgebed opgestuur en ja gesê, “voordat ek genoeg tyd gehad het om ordentlik daaroor te dink,” sê hy.
Die eindresultaat van dié sprong in die duister, Virus-Proof Your Small Business: 50 Ways to Survive the Covid-19 Crisis, verkoop reeds reg oor die wêreld – dis tot in Kroasië en Roemenië beskikbaar. Douglas het dit in een week geskryf. Met nóg ’n week vir redigeer en ’n derde een om dit as oudioboek op te neem. ’n Rekordtyd, aldus sy uitgewer.
Reeds voor die boek verskyn het, het Douglas al van sy wenke op sy YouTube-kanaal gedeel. “Ek glo besigheid is nie ’n zero-som-spel nie. Hoe meer ons almal vooruitgang beleef ... wel, hoe meer vind almal daarby baat. Mense praat soms van ‘selfsugtige kapitaliste’, maar ek sien soveel vrygewigheid rondom my ... sake-eienaars wat alles in die stryd werp om hul personeel aan die gang te hou.”
