Die finansiële adviseur: Nerine Brink, finansiële adviseur by PSG Wealth R21 Employee Benefits

Wat is die verskil tussen ’n aftree- en beleggingsfonds? Is slegs een voldoende vir aftrede, of moet ek albei hê?
SARIE-leser

Hier is ’n vinnige opsomming van die verskil tussen ’n aftree- en beleggingsfonds.

Aftreefondse:

1. Daar is verskillende produkte om vir jou aftrede te spaar. Dit sluit in pensioenfondse, voorsorgfondse, uittree-annuïteite (UA’s) en bewaringsfondse.

2. Die doel van al hierdie fondse is om jou te help spaar vir jou aftrede en om jou van inkomste te voorsien ná jou aftrede.

3. Aftreefondse bied aantreklike belastingvoordele omdat ’n deel van jou bydrae van belasting afgetrek mag word en die groei in jou belegging nie onderhewig is aan belasting nie.

4. Aftreefondse bied beskerming teen skuldeisers.

Beleggingsfondse:

1. Die verskillende produkte sluit in uitkeerpolisse (vaste belegging), vrywillige beleggings en belastingvrye beleggings.

2. Die doel van hierdie beleggings is om finansiële welvaart te skep.

3. Uitkeerpolisse se groei word binne die produk teen ’n marginale koers belas en is voordelig as jou inkomstebelasting meer as 30% is.

4. Vrywillige beleggings het implikasies vir die rente en dividende wat jy daarop verdien asook kapitaalwinsbelasting.

5. Dié fondse beskerm jou nie teen skuldeisers nie.

Elkeen van hierdie produkte het sy eie voor- en nadele, en die geskikste opsie sal afhang van jou persoonlike behoeftes. Kyk jy na aftrede, is pensioenfondse gewoonlik in die lang termyn jou beste opsie, omdat die belastingvoordele jou kan help om jou doelwit vinniger te bereik.

Bydraes tot uittree-annuïteite, pensioen- en voorsorgfondse is belastingaftrekbaar. Dit verminder jou belastinglas – en kan selfs geld in jou sak terugplaas. Geen inkomstebelasting, kapitaalwinsbelasting of weerhoubelasting op dividende word gehef op dié fondse nie. Daar is egter beperkings op jou toegang tot hierdie geld – dit moet gewoonlik wag tot ná jou aftrede. Die ideaal is dus om ook voorsiening te maak vir meer buigsame opsies. 

’n Aftreefonds gaan ook nie noodwendig ná jou aftrede voldoen aan al jou finansiële behoeftes nie, soos byvoorbeeld as jy met vakansie wil gaan of ’n nuwe kar wil koop. Hiervoor is ’n belastingvrye belegging ’n goeie manier om ekstra voorsiening te maak vir jou aftrede. Dit bied ook die voordeel dat jy die fondse voor aftrede kan gebruik.

’n Gekwalifiseerde finansiële adviseur sal jou help om ’n ingeligte besluit te neem oor jou aftredebeplanning.

Wat is my beste opsie om vir aftrede te belê? Moet ek by die bank ’n spaarrekening oopmaak met ’n vaste rentekoers, of in ’n portefeulje belê met ’n veranderlike wisselkoers?
SARIE-leser

Vra jouself dié vrae af voor jy kies 

1. Hoeveel jare het jy oor voor jy aftree?

Hoe langer tyd jy het voor jy aftree, hoe meer risiko’s kan jy neem. En hoe meer risiko’s jy kan neem, hoe groter is jou kans om finansieel beloon te word.

Lae-risiko-bates (soos kontant) kan groei teen ’n voorspelbare pas, maar op die lang termyn gaan jy ’n laer opbrengs kry. Hoë-risiko-bates soos aandele is geneig om op die kort termyn baie wisselvallig te wees, maar dit kan op die duur meer groei toon.

Dus, as jou aftrede om die draai is, kan jy nie bekostig om risiko’s met jou spaargeld te neem nie. As daar nog ’n paar jaar tussen jou en jou aftrede lê, kan jy hoër groei bewerkstellig met strategiese beleggings.

2. Is jy bereid om risiko’s te neem?

’n Hoë-risiko-belegging is een wat baie wisselvallig is. Dit kan dus daal en styg saam met die aandelemark. Jy moet besluit of jy wil waag met aandele.

Maak altyd seker dat jou beleggings gediversifiseer is deur die risiko tussen verskillende bateklasse en sektore te versprei.

3. Wat is jou beskikbare fondse?

Wil jy maandeliks bydra tot jou spaarplan, of ’n paar groter eenmalige betalings maak? Hoe vroeër jy begin, hoe meer tyd het jy om te spaar en kan jy met minder geld wegspring. As jy egter laat wakker geskrik het, gaan jy meer moet spaar. 

4. Wat gaan jou belasting wees?

Belasting speel ’n belangrike rol in die produk wat jy kies, omdat verskillende produkte verskillende belastingimplikasies het.

Weereens kan ’n finansiële adviseur jou help om die regte besluit te neem.

Nog vrae? Stuur vir ons ’n boodskap op Facebook of kontak PSG vir professionele en persoonlike advies.

Volg vir PSG Wealth op Facebook en Twitter

FOTO Verskaf / PSG
FOTO Verskaf / PSG