Weens die Covid-19-pandemie werk baie mense oor die wêreld heen tans van die huis af om kontak tussen mense te verminder. 

Ook in Suid-Afrika het besighede die skuif na tuiskantore gemaak nadat pres. Cyril Ramaphosa ’n noodtoestand aangekondig het. 

Ons weet op kantoor kan daar talle afleidings wees, maar tuis kan jy maklik jou eie grootste vyand raak wanneer dit by produktiwiteit kom.

Dit kan ’n groot aanpassing wees as jy jou kantoor tydelik by die huis moet inrig. Volg hierdie wenke van Hubspot en OneStep Global om seker te maak jou werk gaan normaalweg voort.

1.  Rig jou werkspasie in

Vind ’n hoek in die huis wat jou werkspasie kan wees, en benader dit soos jou lessenaar by die werk. Laat weet jou gesin en/of huismaats dat hulle hierdie spasie as jou werkspasie moet respekteer en jou nie moet onderbreek nie.

Maak seker dat jou rekenaar reg opgestel is om van die huis te werk en dat jy alle dokumente, programme en inligting byderhand het wat jy gaan benodig. Doen ’n toetslopie tuis voor jy die kantoor groet, en maak seker jy vra vroegtydig vir tegniese hulp.

2.  Bly by jou daaglikse roetine

Stel jou wekker normaalweg, en maak seker jy volg dieselfde oggendroetine. Stort, drink koffie en maak reg vir die dag nes jy op ’n gewone werkdag sou doen. Dis belangrik om gedissiplineerd in jou roetine te bly, want wyk jy daarvan af, kan jy maklik motivering verloor.   

Maak elke oggend ’n lys van al die werktake wat jy die dag moet afhandel of kwessies wat jy moet aanroer, en monitor jou produktiwiteit. Teen middagete kan jy weer na jou lys kyk, en teen jou gewone huistoegaantyd moet jy kan rekenskap gee oor wat jy alles uitgerig het – en waarom jy nié by sommige take kon uitkom nie.

3.  Vermy só afleidings

Moenie voor die versoeking swig om ’n vinnige draai op Facebook of YouTube te maak nie. Voor jy sien, het jy ure op sosiale media gemors. Vermy afleidings deur vooraf bepaalde tye vas te stel waarop jy ’n blaaskans weg van jou lessenaar kan vat. 

Sosiale media (wat WhatsApp insluit) kan die grootste demper op jou produktiwiteit wees. Oorweeg dit om met jou kollegas te reël om eerder op ’n aanlyn platform soos Slack of Trello te kommunikeer oor werk, of maak ’n besluit om telefonies of per e-pos te gesels.