’n Nuwe lid het by Kia se sportnuts-koor aangesluit! Die Kia Sonet is nou die Koreaanse vervaardiger se intreevlak sportnutsvoertuig en skuif in onder die gewilde Seltos, wat in 2020 sy verskyning in Suid-Afrika gemaak het. En, soos die Seltos en Kia se ander sportnutse, die Sportage en Sorento, beloof die Sonet om ’n treffer te wees. Die Sonet is veral musiek in die ore vir diegene wat soek na ’n waarde-vir-geld kompakte leefstyl-tipe ryding.

Veral oor die afgelope paar maande het motorvervaardigers se aanbod van bekostigbare sportnutse ontplof en die Sonet se mededingers sluit die Ford EcoSport, Nissan Magnite, Suzuki Vitara Breza en Toyota Urban Cruiser in. Maar die Sonet mag dalk net die ster-solovertoning lewer…

Die huidigde topmodel in die Sonet-reeks is die EX-weergawe, wat ons ook toetsbestuur het. Daar is ’n goedkoper LX-weergawe ook, wat nes die EX met ’n handrat of CVT (palwisseltransmissie, dus die “outomatiese model) beskikbaar is. 

Met die eerste oogopslag is dit moeilik om nie van die Sonet te hou nie. Dit lyk modieus en meer stylvol as meeste van sy mededingers en die hoë grondvryhoogte, bultende wielboë, dakreëlings, ’n prominente sierrooster met chroom-afwerking en 16-duim allooiwiele trek ook aandag.  

FOTO Verskaf

Dit lyk sommer na ’n ryding wat in ’n duurder klas hoort en eerder met iets meer premium soos die Volkswagen T-Cross moet meeding.

Binnelangs beïndruk die Sonet met ooglopende goeie bougehalte en afwerking. In EX-gewaad is dit luuks en voel goed soos die kontroles, sitplekmateriaal en leerstuurwiel duursaam. Die EX-toetsmodel is goed toegerus met al die nodige luukse en geriefskenmerke, asook moderne tegnologie soos ‘n raakskem, wat oor Apple CarPlay en Android Auto beskik en via Bluetooth koordloos met jou slimfoon gesels. Boonop is dié skerm ook vir die trukamera, wat dinge baie vergemaklik vir die bestuurder as daar geparkeer of agteruit gery word. Vir agterste passasiers is daar ook twee USB-sokke, wat toestelle kan laai.

FOTO Verskaf

Die Sonet verras jou verder met genoeg spasie vir vier passasiers om gemaklik te wees, terwyl die kattebak met bykans 400 liter se ruimte, nogal groot is vir die Sonet se segment is.

Baie belangrik is dat die Sonet ’n veilige voertuig is danksy veiligheidstelsels soos elektroniese stabiliteitsbeheer, sluitweerremme, ISOFIX-monteringspunte vir ? babastoeltjie en voorste lugsakke.

Onder die enjinkap is ’n gewillige 1,5-liter-petrolenjin wat 85 kW se krag teen 6 300 r/min en 144 Nm se wringkrag teen 4 500 r/min ontwikkel. Die Sonet se palwisseltransmissie (’n outomatise tipe ratkas) verrig ’n goeie taak en bied gladde ratwisselings. In die geheel is verrigting goed en voel die Sonet ratser as wat ’n mens verwag, terwyl die ritgehalte ook verras en die Sonet baie stewig op die pad voel.

FOTO Verskaf

Die slotsom is dat Kia met die Sonet nóg ’n goeie pakket bied en ’n voertuig is wat die pas in sy segment aangee. Dan is dit veral belangrik vir die verbruiker om ook in gedagte te hou dat die Sonet (nes ander Kia’s) oor ’n omvwattende waarborg van vyf jaar en onbeperkte kilometers en ? vier-jaar/60 000 km-diensplan beskik.

Pryse vir die Sonet begin by R264 995, met die EX CVT-model wat R305 995 kos.