Tog is ’n blinknuwe sportnuts se prysetiket bo talle mense se vuurmaakplek, maar dit keer egter nie motorvervaardigers om sakpas-rygoed ’n sportnuts-jassie aan te trek nie… En voila, kan jy ’n motor bekostig wat darem bietjie meer robuust lyk! Twee sulke motors is Suzuki se baie gewilde Ignis en die indrukwekkende Ford Figo Freestyle, wat ek onlangs toetsbestuur het.
Dié gespierde buksie is op Ford se Figo-luikrug gebaseer en in Freestyle-gedaante trek dit baie die aandag. Om dit te onderskei van die gewone Figo, het Ford die Freestyle met talle sportnuts-onwerpseienskappe opgekikker. Só staan dit byvoorbeeld sowat 2cm hoër en is dit gepantser met bykomende kenmerke soos swart plastiekbeskermingstroke op die bakwerk, dakrakke en silwerkleurige skermstroke onder die voorste en agterste buffers. Die Figo Freestyle is in twee afwerkingspakette, Trend en Titanium, beskikbaar. Ons het die deftiger Titanium-model toetsbestuur wat ‘n lang lys geriefs- en tegnokenmerke bied soos ’n raakskem multimediastelsel met Apple CarPlay en Android Auto, klimaatbeheer en elektriese vensters vir al die deure. Vir gemoedsrus is daar onder meer ses lugsakke en ABS-remme. Onder die enjinkap is ’n baie bekwame 1,5-liter driesilinder petrolenjin wat ’n redelike 91 kW se kraglewering ontwikkel – dit stel dié buksie in staat om 0 – 100 km/h in 11,8 sekondes kaf te draf met ’n topspoed van 175 km/h te haal. Volgens Ford is die gemiddelde brandstofverbruik ’n goeie 5,5 liter/100 km. Die Figo Freestyle is ’n oulike ryding wat vertroue inboesem op die pad en regtig voel of dit goed aanmekaar gesit is.
Pryse begin by: R241 100
