In ’n treffende gousblom-geel skepping het Shudufhadzo Musida (24) van Ha-Masia in Limpopo die kollig by die onlangse Mej.Suid-Afrika-kompetisie gesteel.
Op die verhoog het sy met grasie geloop, haar antwoorde met kalmte en wysheid beantwoord.
Ten spyte van ’n wêreldpandemie wat byna almal se drome, planne en glansgeleenthede vir 2020 in die spore gestuit het, het die Mej. SA-organisasie flink gewerk om binne streng Covid-19-regulasies met die kroning van Suid-Afrika se 62ste skoonheidskoningin voort te gaan.
Dié glansgeleentheid is by die Table Bay Hotel in Kaapstad gehou met ’n beperkte gastelys.
Nes Zozibini Tunzi, voormalige Mej. Suid-Afrika en ons huidige Mej. Heelal, het Shudufhadzo gewaag met haar natuurlike voorkoms wat nie binne die stereotipiese raamwerk van skoonheidskompetisies val nie.
En dit maak absoluut sin, wanneer jy glo dat jy self goed genoeg is en dat dit nie nodig is om jouself aan die wêreld se tradisionele ideale te meet nie, verwesenlik jy ware skoonheid. Dis immers SARIE se 2020-leuse: Jy is genoeg.
“Shudu het bewys dat enigiemand waardig genoeg is om Mej. SA te kan wees. Dat vrouens met kaalgeskeerde koppe óók mooi is,” sê Schané Venter, SARIE se 11de Voorbladgesigwenner en Mej.SA se Operasionele Hoof. Schané glo dat Shudufhadzo tydens haar kroningsjaar regtig mense se harte sal aanraak en hulle die vrymoedigheid sal gee om openlik oor persoonlike kwessies soos geestesgesondheid te praat.
“Haar kennis oor politiek, internasionale handel en geestesgesondheid strek buite die grense van Suid-Afrika. Dis ’n storie en ’n cause wat mense in Afrika sal help.”
En wat staan vir Schané uit as sy aan Shudufhadzo dink? “Haar opregte uitdrukking van emosie, sy is nie bang om te sê en te wys hoe sy voel nie. Haar opregtheid, eerlikheid, weerloosheid – dat sy nie bang is om net haarself te wees nie. Sy het ’n doelbewuste besluit geneem dat sy ook mooi kan wees, al is dit sonder hare.”
Die SARIE-skoonheidspan het by Shudufhadzo ingeloer ...
1. Wat is jou skoonheidsfilosofie?
Eieliefde kom eerste. Wanneer jy eieliefde beoefen sal jy ware skoonheid uitstraal.
2. Wat is jou gunsteling gelaatstrek en hoekom?
My glimlag en sekerlik my lippe!
3. Hoe plaas jy klem hierop om dit nog meer te komplementeer?
Ek hou daarvan om lipomlyner en donker lipstiffie te dra. Dit laat my lippe nóg meer uitstaan en gedefinieerd lyk.
4. Jou moet-hê skoonheidsproduk?
Sonskerm. Ek dra daagliks sonskerm, selfs wanneer die son nie skyn nie.
5. Jou beste grimeertruuk?
Verbloemer! Met verbloemer, lipstiffie en maskara lyk jou voorkoms vinnig afgerond. Ek wend verbloemer onder my oë en op my neus aan. Vir ’n vinnige grimeervoorkoms is verbloemer beslis die antwoord.
6. Wat is jou raad aan jonger vroue wat met selfaanvaarding sukkel en nie gemaklik in hul eie vel voel nie?
Eieliefde is ’n persoonlike reis, maar dis die mooiste reis wat jy ooit sal onderneem. Ek het self hiermee gesukkel. Gaan staan voor die spieël en identifiseer iets van jouself waarvan jy hou. Dis ’n goeie beginpunt. Jy is mooi, jy is waardig, jou drome dra waarde, jy het ’n pragtige glimlag ... En onthou om vir jouself te glmlag terwyl jy dié woorde hardop sê. Dit is altyd so maklik om onsself af te kraak en weer baie moeilik om iets oor onsself te sê waarvan ons hou.
7. Wat is jou gunsteling kleintyd-herinnering?
Wanneer ek en my niggies en nefies ná skool buite my oupa se huis gespeel het. My oumagrootjie het altyd vir ons die lekkerste kos gemaak, terwyl ons buite gespeel het.
8. Watter boek het jy vanjaar gelees wat jou geïnspireer het en hoekom?
The Four Agreements geskryf deur Don Miguel Ruiz. Dié boek het my siening oor myself en oor my identiteit verander. Dit het my laat besef dat ek volgens my eie maatstawwe, wie ek as individu is, kan identifiseer. Dat van die mees belangrikste besluite, wat ons al gedurende ons leeftyd moes neem, nie ons eie besluite was nie. Sodra ons die vryheid het om waarlik ons eie besluite te neem, dan móét ons dit doen.
The Four Agreements Wisdom Book (R333) Beskikbaar aanlyn by www.exclusivebooks.com
9. Jy kan met enige inspirerende vrou gaan koffie drink. Wie sou dit wees en wat sou jy haar vra?
Ek dink Michelle Obama. Alle oë is op haar sodra sy ’n vertrek binnetree. Sy is ’n ongelooflike inspirasie vir baie vroue en jong dames. Sy straal leierskap uit, maar daarteenoor het sy ook ’n sagte, moederlike aard. Sy is ’n sprekende voorbeeld vir almal en wys wat die ware rol van vrouens in die moderne samelewing is.
10. Wat is jou lewensles waaraan jy vasklou as jy deur ’n moeilike tyd gaan?
Ek het onlangs geleer om eers op die kleiner oorwinnings te fokus. Fokus eers op die klein oorwinnings en streef die groter oorwinnings ywerig na. Veral nóú tydens die pandemie. Tydens moeilike tye moet ons op die klein oorwinnings fokus. Dit sluit om in die oggende op te staan, te gaan stap en om jou gunsteling ete voor te berei, in. Dit sluit die een uur wat jy kans kry om produktief te werk, in. Selfs wanneer jy nie meer as ’n uur daaraan kan spandeer nie - jy is steeds ’n oorwinnaar.
Wanneer jy uiteindelik meer tyd kan afstaan, dan verskyn die groter oorwinnings alreeds op die horison. Ons is baie krities teenoor onsself. Soms verg dit juis hierdie kleiner oorwinnings wat na die groter mylpale toe sal lei.
Teken in en kry onbeperkte toegang tot 11 Afrikaanse tydskrifte en 35 koerante. Alles op een plek.
KIES JOU PAKKET
