Die aktrise Ashley Tisdale het onlangs op haar Instagram-blad gedeel dat sy óók met die outo-immuunsiekte, alopesie areata, gediagnoseer is. Vroeër verlede jaar het aktrise Jada Pinkett Smith erken dat sy dieselfde diagnose het.
Ashley vertel dat sy reeds in haar twintigerjare ’n kaal kol by haar haarlyn opgemerk het. Nadat sy haar dermatoloog besoek het, is sy met alopesie gediagnoseer. Sy beklemtoon hoe stres die outo-immuunsiekte kan vererger en het deur die jare opgelet dat dit ’n deurslaggewende invloed op haar haargroei het.
