Met haar vertolking as Monique Ross in kykNet & kie se Afrikaanse telenovelle, Arendsvlei, het Robyn Rossouw gou haar plek op die kleinkassie volgestaan. Nou is sy in die SABC2-reeks Swartwater te sien.

Sy is gaande oor haar werk as aktrise, maar die gepaardgaande kommentaar op sosiale media van kykers wat haar met valkoë dophou, bly uitdagend. 

FOTO Instagram / Robyn Rossouw

Maar steeds beskou Robyn, ’n trotse Kimberliet, haarself as ’n positiewe en optimistiese mens.

FOTO Instagram / Robyn Rossouw

In ’n interessante vraag-en-antwoord sessie het Robyn die volgende oor hare, grimering en velsorg beantwoord …

Watter bekende skoonheid inspireer jou?

Selena Gomez. Ek hou baie van Selena se natuurlike voorkoms. Sy dra nie swaar grimering nie, ek is ook so ’n tipe mens.

FOTO Instagram / Robyn Rossouw

Watter velsorgtendense wil jy graag die jaar op die proef stel?

Ek sien dat almal deesdae hialuronsuur vir hulle vel gebruik, ek wil dit regtig graag uittoets!

Jou gunsteling gelaatstrek en hoe beklemtoon jy dit?

My oë en wenkbroue! Ek hou baie daarvan om ’n burnt orange of brons oogskadu op my ooglede aan te wend. Dié kleur doen net iets anders vir my oë en velkleur. My wenkbroue is al van kleins af woes, maar ek raak nie daaraan nie! Ek gebruik sommer ’n ou tandeborsel en kam die wenkbrouhare mooi opwaarts. Die wilde voorkoms is my gunstelling.

FOTO Instagram / Robyn Rossouw

Jou grootste grimeerfout?

Pikswart oogomlyner op my waterlyn. As tiener het ek dit baie so gedra, later het ’n vriendin vir my gesê dat dit my oë kleiner laat lyk. 

Jou geheim om jou krulle mooi gedefinieerd te laat lyk?

Ryswater! Ryswater werk soos ’n bom om proteïene in jou hare te sit, dit versterk jou hare, jou krulle is meer gedefinieerd en jou hare groei ook ongelooflik vinnig! Ek kan nie genoeg daaroor praat nie!

FOTO Instagram / Robyn Rossouw

Robyn se ryswater-resep:

1 koppie rys

2 koppies water

1 groot plastiekhouer met ’n deksel

1 spuitbottel

FOTO Unsplash / Matthew Lakeland

Stap-vir-stap metode:

1. Spoel die koppie rys met een koppie water vir so 10 sekondes in die plastiekhouer skoon. Dreineer die rys.

2. Gooi nou weer ’n koppie water by die rys en maak die bak met die deksel toe.

3. Los dit vir 24 uur.

4. Sit die ryswater in die spuitbottel.

Ryswater-metode vir jou hare:

1. Was jou hare deeglik met sjampoe en opknapper.

2. Kam jou hare uit en verdeel in werkbare gedeeltes.

3. Sproei die ryswater op jou kopvel en vryf dit in jou kopvel in.

4. Herhaal dieselfde proses met jou haarlengtes.

5. Seël jou hare met byvoorbeeld ’n plastieksak ok kleefwerende plastiek vir so vier ure.

6. Verwyder dit en spoel eers jou hare na so 10 ure met koue water af.

 Onthou ...

  • Dié doepa het ’n vreemde, gefermenteerde reuk. Beplan daarom mooi wanneer jy hierdie proses wil uitvoer. 
  • Herhaal elke tweede week.
  • Gebruik elke keer ’n vars, nuwe mengsel.