Suid-Afrikaners is baie opgewonde oor die vooruitsig dat haarsalonne binnekort weer hul deure kan oopmaak. 

Het jy al besluit wat jy met jou haredos wil doen wanneer jy uiteindelik weer by jou haarkapper kom? Hier is so ’n paar giere wat die afgelope tyd begin kop uitsteek het, party meer gewaagd as ander!

Watter een is jou gunsteling?

Mikro-kuif

Dié stompgesnyde kuif is meer waaghalsig. Dit staan ook as baby bangs bekend en word tot in die middel van jou voorkop gesny. Dit pas kleiner gesigvorms.

FOTO Instagram / Coiffeur Story
FOTO Instagram / Scar Hair

Moderne perm

Die afgelope paar jaar klop ál meer vroue by haarsalonne vir permanente golwing aan. Ja, die gewilde perm van die tagtigerjare is terug. Te danke aan nuwe aanwendingstegnieke het haarstiliste nou meer beheer oor die grootte en vorm van die krulle.

Party vroue is so waaghalsig om hul perm in die shag-styl te dra.

FOTO Instagram / nuzhynanata
FOTO Instagram / The Hair Bros

Rooi skakerings

Jy kan gerus hierdie kleur oorweeg, van ligrooi tot ’n meer uitspattige rooi is in die kol. Probeer goue of koper ligstrepe om jou rooi kapsel diepte en dimensie te gee.

Kies vir die koue maande haarkleure met ’n warmer ondertoon wat minimale instandhouding verg. Dink goudrooi, aarbeiblond en sjokolade- of kastaiingbruin, sê Boyd Meilhon, meester-stileerder by die haarsalon Carbon in Johannesburg. “Sagte ligstrepe wat jou gesig raam, is ook gewild en groei mooi uit.”

FOTO Instagram Show Hair & Beauty
FOTO Instagram / Scar Hair
FOTO Instagram / Scar Hair
FOTO Instagram / Scar Hair

“E-girl”-hare:

Dié tendens onder die jongklomp neem ons terug na die 90’s. Twee slierte wat jou gesig raam word ’n ander kleur gekleur as die res van jou hare. Die haarvoorkoms word veral op TikTok gesien, en sommige is selfs dapper genoeg om die kleurproses ook af te neem.

FOTO Instagram / Burito Vibes
FOTO Instagram / Sydney L Cruz

Helder kleure by jou haarwortels

Dié tendens herinner aan die Amerikaanse sanger Billie Eilish se uitspattige groen hare. By ’n onlangse modevertoning van Dries van Noten is die modelle se haarwortels met helder vere verbloem.

Billie se ikoniese kapsel het daartoe gelei dat verskillende skakerings van groen nou gewild is.

FOTO Instagram / Scar Hair
FOTO Instagram / Scar Hair

Japannese knope

Dié interessante knope word deur Japannese skoonheidstendense geïnspireer. Dis kompleks met verskillende kinkels, knope en vorms. Sal jy dit waag?

FOTO Instagram / Sam McKnight

’n Diep kantpaadjie

Kikker jou voorkoms binne vyf sekondes op deur bloot jou haarpaadjie te verander. Dié seisoen is ’n diep kantpaadjie en glad uitgeblaasde hare pasmaats. Spuit ’n bietjie haarsproei teenaan jou kantpaadjie en kam jou hare netjies agter jou ore in vir ’n gesofistikeerde voorkoms.

FOTO Getty Images / Gallo Images

Bron: www.elle.com