Lus vir lag? Die sketskomedie Ben & Bez, eksklusief op Netwerk24, is jou antwoord. Uit die pen van Schalk en Bennie met gaste soos Simoné Nortmann, Mila Guy en Frank Opperman. Kyk die eerste episode hier!

Op stel van die sketskomedie “Ben & Bez”. FOTO Instagram/Bennie Fourie

Reg vir ’n paar *skoonheidswenke? Hier is hul antwoorde!

Dié skoonheidswenk is noodsaaklik om die somerson mee aan te durf ...

Bennie: Dis ’n moeilike ene. Ek wil sê ’n pet, maar dis ook maar moeiliker as jy ouer raak. As jy dertig raak, raak jou hare min en dan moet jy versigtig wees om ’n pet te dra. So kyk na jou haarlyn en as jy dit kan bekostig, dra ’n pet.

Schalk: Beslis, beslis, beslis sonroom. Ek brand maklik, ’n rooi gesig en ’n snor is nie die beste kombinasie nie!

Dié skoonheidsproduk het jy vir die somer nodig ...

Bennie: ’n Lekker aangename ietsie om onder die arm te spuit. Ons moet pasop, die somer kan maar warm raak.

Schalk: Goeie tandepasta. Mense sien dit nie noodwendig as ’n skoonheidsproduk nie, maar dit maak jou asem mooi.

Dís my gunstelingparfuum vir die somer ... 

Bennie: Ek het dié geur al sedert die begin van hoërskool gedra. Ek hou van dinge as dit werk. So ek stick by Solo Energy, dis my brand.

Schalk: My ma het toe ek op hoërskool was, vir my ’n botteltjie Tommy Hilfiger gekoop. Ek gebruik dit nou nog. Ek kan op my een hand tel hoeveel keer ’n jaar ek parfuum gebruik. Dis net vir spesiale geleenthede soos ’n doop of ’n aandete by die Spur.


* Die antwoorde was deel van aanlyn-artikel wat in Desember 2019 op SARIE.com verskyn het.