Toe Marize Albertyn, ’n visuele ontwerper van Stilbaai, sukkel om ’n parfuum te vind wat haar volkome soos haarself laat voel, het sy besluit om haar eie te laat skep. Sy het die plaaslike parfumeur Marie Aoun, stigter van die natuurlike parfuumhuis Saint d’Ici, genader en vandaar is Flóreer, ’n botaniese parfuum met slegs geurnote wat van natuurlike bestanddele ontgin is, gebore. Volgens Marize verpersoonlik die geur die nastrewe na sagte sterkheid en skep dit ’n gevoel van gegrond wees.

Marize Albertyn, visuele ontwerper by She Is Visual. FOTO She Is Visual

Ons het met Marize gesels om meer uit te vind oor dié spesiale parfuum:

1. Wat het jou laat besluit om Flóreer te skep?

Ek het in 2017 begin om al my skoonheidsprodukte wat skadelike middels bevat te vervang met natuurlike alternatiewe in ’n poging om die simptome van polisistiese ovariële sindroom (PSOS) te verlig. Ek het stadig maar seker nuwe produkte gevind, maar ek het soos ’n neut geklou aan my parfuum omdat ek nie op daardie stadium ’n natuurlike alternatief kon vind nie. In 2018 het my man vir my ’n kaartjie vir ’n botaniese parfuum werkswinkel gegee. Dit het absoluut my wêreld verbreed en my honger gemaak om meer te weet en so het ek op Saint d’Ici afgekom en my eerste botaniese parfuum genaamd Entier begin gebruik.

Hoewel ek mal is oor Entier, het my hart gehunker na ’n parfuum wat effens sagter is en my meer soos myself sal laat voel – sag dog sterk. Dis toe dat ek besluit om die parfumeur agter Saint d’Ici, Marie Aoun, te nader om ’n parfuum te skep wat dit verteenwoordig.

2. Wat was die inspirasie agter die konsep en note?

Ek was van die begin af oortuig dat die parfuum ’n blomme-aspek moet he^, maar ek het dit baie duidelik gemaak dat dit nie te soet en lighartig moet wees nie. Dit moet jou saggies ontmoet, maar steeds ’n gevoel van rypheid, volwassenheid en gegrondheid hê.

Die boonste note is romerige witblomme, die hart appelkoos – dit bring ’n rypheid uit die parfuum – en die basisnoot is hooi, wat ’n aardse reuk nalaat.

3. Hou jy nog altyd van parfuum dra?

Ek is mal oor parfuum en het hope herinneringe aan al my ma se parfuums en die seisoene van my kindwees wat daaraan gekoppel is. Een van die herinneringe wat die grootste impak op my gemaak het was toe ek so 10 jaar oud was. Ek was as klein dogtertjie verskriklik geheg aan my ma en om te skei van haar was altyd ’n tranedal. My ouers is lief vir die we^reld verken en wanneer hulle oorsee gereis het was die skeiding en afstand vir my besonders moeilik, veral met slaaptyd. Eendag net voor ’n reis het my ma met die briljante plan vorendag gekom om haar parfuum op my kopkussing te spyt as troos en om ’n stukkie van haar by my te los. Dit was ongelooflik hoe goed dit gewerk het. Dis daar waar ek besef het dat parfuum die vermoë het om soveel meer te wees as lekker ruik. Parfuum het soveel sagte krag.

4. Vanwaar die naam Flóreer?

Ek het geleer dat ek floreer wanneer ek eg aan myself is en in my waarheid stap. Om jouself te leer ken, verstaan en daagliks te kies om jou pad te aanvaar en te omhels is nie altyd die maklikste pad om te kies nie, maar dit is vir my verreweg die rykste pad. Om te floreer beteken nie dat jou lewe elke dag moet blom nie, net soos wat geen blom elke dag doen nie. Vir my is die geheim om, net soos ’n blom, my seisoene te ken en myself daarvolgens te troetel. Dan is ek die beste weergawe van myself vir almal wat ek liefhet in my lewenstuin.

Om te weet
’n Beperkte aantal bottels Flóreer is beskikbaar om te koop teen R1 700 vir 50 ml. Besoek sheisvisual.com.