Wêreldwyd is vroue se selfbeeld laag, want weens sosiale media word ons daagliks gebombardeer met onrealistiese standaarde vir mooilyk en gelukkig wees. Om vroue te bemagtig en bewustheid rondom self-aanvaarding en self-liefde (om vir jouself lief te wees en te glo #JyIsGenoeg) aan te moedig het die skoonheidshuis The Body Shop hul Self Love Uprising-veldtog geloods waar hul onder meer praktiese wenke en sinvolle onderhoude met kampvegters vir vroue deel.

Een van dié kampvegters is die Britse aktrise Jameela Jamil wat, buiten haar rol in die gewilde TV-reeks The Good Place, bekend is vir haar uitgesprokenheid oor self-liefde, die aanvaarding van jou liggaam en geestesgesondheid. SARIE het onlangs die geleentheid gehad om virtueel met Jameela te gesels oor self-liefde en boelies, goeie sosiale media raad en wat sy vir haar jonger self oor haar liggaam sou sê.

View this post on Instagram

A post shared by Jameela Jamil (@jameelajamilofficial)

1. Glo jy om self liefde te hê is genoeg om die effek van boelies teen te werk?

Ek dink dit kan jou sterk “teenliggaampies” teen boelies laat opbou en help dat die woorde en dade van ander jou nie so seermaak of jou selfbeeld definieer nie. Ek glo ook dat as almal meer vir hulself lief is, sal jy minder geneig wees om ander te boelie en sal ons ’n meer goedhartige wêreld hê.

2. Wat is jou mening oor vroue wat vir estetiese behandelings gaan om hul voorkoms te verander?

Lewe en laat lewe. Maar ek glo dat wanneer jy daardie besluit neem jy werklik jou redes daaragter ondersoek. Hoekom doen jy dit? Vir wie doen jy dit? Is daar ’n gaping wat jy probeer vul? Ek wil net hê vroue moet hierdie behandelings doen want hulle wil en nie omdat hulle glo hulle móét nie. Dis net so met grimering dra: dra dit om jou eienskappe te vier en nie om dit weg te steek nie.

3. Wat sal jy aan jou jonger self sê oor jou lyf?

Ek sal bloot sê dat enigiets wat jy nie vir ’n goeie vriendin of ’n vrou vir wie jy lief is sal sê nie, mag jy nie vir jouself sê nie.

4. Hoe kan vroue sosiale media ’n meer positiewe plek vir hulself maak?

Ons moet besef dat ons in beheer is. Ons kan kies wie ons wil volg. Só kan jy jou aanlyn-wêreld pasmaak sodat jy geïnspireerd en gekoesterd voel, pleks van asof daar iets van jou weggevat is. Ek volg bv. nie modelle, bloggers of enigiemand wat my laat sleg voel oor myself of my lewe nie. Ek volg mense wat – wanneer ek uit die platform uitgaan – my nie laat voel dat ek iets van myself moet gaan verander nie, maar eerder dat ek iets geleer het.

5. Hoe kan vroue leer om meer lief te wees vir hulself?

Ek dink dis ’n lang reistog na jou binneste waaraan jy daagliks moet werk. Wat gaan werk verskil van vrou tot vrou. Dis soos ’n liefdestaal wat jy moet aanleer en ons moet almal tyd neem om uit te vind hoe jy vir jouself liewer kan wees.