Tydens jou swangerskap word jy met klomp moets en moenies oorweldig. Familie, vriende en ander ervare mammas deel aanhoudend raad uit - soveel so dat jy dalk deurmekaar voel en self begin wonder wat waarlik die beste vir jou en jou kleinding gaan wees.

Daar is ontelbare velsorgprodukte wat veilig is om tydens jou swangerskap te gebruik, maar daar is tog spesifieke produkte en bestanddele wat jy eerder moet vermy. 

Photo of a young pregnant woman getting ready in t
FOTO Getty Images / Gallo Images

Hier volg dr. Alek Nikolic, spesialis in Estetiese Medisyne en uitvoerende direkteur van die aanlyn velsorgwinkel, SkinMiles, se velsorg-gids vir swanger vroue: 

Bestanddele wat jy verkieslik moet vermy:

1. Retinoïede

Bestanddele soos retinol en vitamien A werk kragtig om jou vel nuwe lewe te gee. “Daar is wel studies wat bewys dat hoë dosisse van vitamien A skadelik vir ’n ongebore baba kan wees,” sê dr. Alek. 

Retinoïede wat mondeliks ingeneem word om byvoorbeeld velkwale soos aknee te behandel kan ’n nadelige uitwerking op die groeiproses van ’n ongebore baba tot gevolg hê. Vermy enige vorm van retinoïede tydens jou swangerskap en wanneer jy borsvoed.

Kyk uit vir: Differin, Retin-A, Retinoic acid, Retinol, Retinyl linoleate, hydroxypinacolone retinoate en Retinyl palmitate op produkverpakkings.

Trendy Collage made of Natural Cosmetics and Beaut
FOTO Getty Images / Gallo Images

2. Salisielsuur

Salisielsuur is afkomstig van aspirien wat ’n nadelinge invloed op jou swangerskap kan hê. Salisielsuur is ’n gewilde bestanddeel in verskeie velsorgprodukte soos reinigers, vogrome en afskilferaars. 

Kyk uit vir: Salicylic Acid, Beta Hydroxy Acid en BHA op produkverpakkings.

ONTHOU

Nie alle sure is taboe nie. Jy kan nog steeds produkte met alfahidroksisure (AHA) soos glikolsuur en melksuur in hierdie tyd gebruik.


3. Soja

“Soja het geen skadelike impak op jou ongebore baba nie, maar daar is bewys dat soja pigmentasie soos melasma kan aanwakker,” sê dr. Alek. Lees meer hier.

As jy reeds met hiperpigmentasie sukkel, probeer om vir eers soja te vermy. 

Kyk uit vir: Lethicin, Phosphatidylcholine, Soy en Textured Vegetable Protein (TVP) op produkverpakkings.

Photo of a young pregnant woman getting ready in t
FOTO Getty Images / Gallo Images

Bestanddele wat veilig is om te gebruik:

1. Haarverwyderingsprodukte

Produkte wat ongewenste hare help verwyder word as veilig beskou. Onthou om net eers op ’n klein deel van jou vel die produk te toets voordat jy dit oral aanwend.

2. Sonskerm

Sinkoksied en titaandioksied wat algemeen in sonskerm voorkom is veilig om te gebruik.

3. Grimering

Grimering is oor die algemeen veilig om tydens jou swangerskap te gebruik. Onthou, daar is wel grimeerprodukte wat byvoorbeeld retinol of salisielsuur bevat wat spesifiek vir veltipes wat met aknee sukkel geformuleer is.

Trendy Collage made of Natural Cosmetics and Beaut
FOTO Getty Images / Gallo Images