Weens die Covid-19-pandemie wat tot die amptelike grendeltyd gelei het, het ons skoonheid- en grimeerroetines meteens óók verander. Aangesien ons nie kon werk toe gaan of sosiaal verkeer nie, het ons nie meer daagliks grimering gedra nie.

En dit het ons bestaande velkwale en frustrasies rakende ons voorkoms nog méér help uitlig. Dis egter belangrik om sonder grimering steeds met selfvertroue die wêreld in die oë te kan kyk. Jou skoonheid defineer jou nie, wie jy ís ... dis wat tel.

FOTO Instagram / SKOON. Skincare

As jy egter sekere velkwale wil aanspreek is daar ’n magdom nie-chirurgiese behandelings wat blywende resultate tot gevolg het, sodat jy nie voortdurend voel dat jy jou vel met grimering hoef weg te steek nie.

Boonop sal dit jou sak beter pas en minder pyn en ongemak as meer intensiewe kosmetiese prosedures beteken.

“Dis ’n opwindende industrie. Daar is gereeld nuwe toestelle wat bekend gestel word om velkwale te behandel en te voorkom,” sê Tzvia Hermann, stigter en mede-eienaar van die estetiese kliniekgroep The Laser Beautique. Tradisionele gesigbehandelings word al meer met tegnologiese toestelle behartig, sê sy.  

“Vroue belê meer in hulself as in materialistiese goed."

Tzvia Hermann

Tzvia beveel dié 3 nie-chirurgiese behandelings aan:

Vir ongewenste hare ...

1. Apilus-behandeling

Dis ’n elektrolitiese toestel wat spoedig werk en pynloos is om effektief hare te verwyder. “Dis die enigste effektiewe haarverwyderingsbehandeling vir ligter hare aangesien laser nie hare met min of geen pigment goed kan verwyder nie.”

Teenoor ouer, tradisionele elektrolise word hitte energie spoedig op die wortel van die haarfollikel versprei sodat die haar vinnig verwyder kan word en beperkte tyd het om die vel te kan irriteer. Dis te danke aan termolise-tegnologie dat die behandleing byna pynloos is. 

Dit werk baie goed vir areas soos jou ore, neus, tone, gesig en selfs jou wenkbroue! As gevolg van die vorm van die apparaat kan dit maklik op enige area gebruik word - die haar moet net sigbaar wees. 

FOTO The Laser Beautique

Die aantal sessies verskil afhangende van die spesifieke area. Lees meer hiér.

Vir velveroudering ...

2. CooLifting

Dié gewilde verjongingskuur is in Spanje ontwikkel. “Jy lyk waarlik 10 jaar jonger! Dis merkwaardig hoe ’n voginspuiting jou vel meteens op plomp,” sê Tzvia.

SARIE-skoonheidskrywer Suanné Mulder het die behandeling al op die proef gestel:

Ek begin al hoe meer fyn lyntjies om my oë opmerk. Hoewel dit my nog nie pla nie, wil ek graag voorkomend optree en ek het die kans aangegryp om ’n CooLifting-behandeling uit te toets.

Dit behels ’n spesiale toestel wat gebruik word om hoë konsentrasies hialuronsuur en botaniese bestanddele met behulp van koolstofdioksied tot diep binne jou vel te stoot. Dit verbeter die lewering van suurstof en voedingstowwe aan die vel en stimuleer selvernuwing en kollageenproduksie.

Die terapeut het eers my gesig gereinig, afgeskilfer en liggies masseer, waarna sy die toestel vir sowat 5 minute oor my gesig beweeg het terwyl sy op die vel om my oë en mond gefokus het. Daarna het sy my gesig weer masseer, oortollige serum verwyder en die behandeling afgerond met vogroom en ’n sonskerm.

Alles is pynloos en geen hersteltyd is nodig nie en ek kon dadelik ’n verskil sien: My vel se tekstuur was meer egalig, dit was glansend en die lyntjies om my oë minder opsigtelik. Perfek vir net voor jou Desember-vakansie!

Tzvia sê dis ideaal om op jou beste vir die somervakansie te lyk, want daar is geen hersteltyd nie en jy behoort vinnig blywende resultate te sien.

Prys: R1 800 by The Laser Beautique-salonne

Vir ’n vlekkelose gelaat ...

3. SPL

Ligbehandelings soos Square Pulsed Light (SPL) is ’n fantastiese behandeling om van vlekke, rosacea, akneemerke, verkleuring en ander veltoestande wat die voorkoms van jou vel kan benadeel ontslae te raak, sê Tzvia. 

FOTO Instagram / Dermastore SA

SPL is baie soos Intense Pulsed Light (IPL) wat ligstrale inspan om die oppervlakkige rooi en bruin pigmente aan te trek. Dié pigmente word verhit wat dit dan laat saamtrek en oplos. Met ’n SPL-ligbehandeling is elke pols effens langer, maar die lig-golflengte is nie só intens nie. Dit beteken dat jou vel nie sommer oorverhit nie. 

Onthou dat meer sessies nodig is om resultate te sien. Ses tot agt sessies is om en by nodig vir ’n egalige veltekstuur wat vlekkeloos, sag en soepel lyk.