Sy is nie net die TV-aanbieder van ’n geliefde pasmaat-reeks nie, maar ook nou die voorbladster van SARIE se Maart/April 2021-uitgawe. Ja, alle oë is op Marciel!

FOTO Instagram / Marciel Hopkins
FOTO Instagram / Marciel Hopkins

Ons kan ons verkyk aan die internasionale model en aktrise, want vir haar kan jy beslis deur ’n ring trek.

Marciel op die Maart/April-uitgawe van SARIE-tydskrif.

Dis áls te danke aan die grimeerkunstenaar en haarstilis, Estelle Pretorius, dat Marciel eksieperfeksie voor die kamera lyk. Die SARIE-skoonheidspan het gaan ondersoek instel.

“Dit is verseker die grootste voorreg om Marciel se persoonlike grimeerkunstenaar en stilis vir Boer Soek n Vrou te wees. Marciel het haar voorkoms in my hande oorgelaat en daardie tipe vertroue is ’n absolute eer,” vertel Estelle. 

Natuurlike voorkoms

Tydens verfilming was dit vir Estelle belangrik om op ’n natuurlike voorkoms vir Marciel te fokus. “My benadering met enige gesig wat ek grimeer, is om altyd hul natuurlike skoonheid te beklemtoon en aandag op die persoon se unieke gelaatstrekke te plaas. Marciel is van nature besonders beeldskoon en my benadering tot haar grimering en stilering op stel was altyd om haar natuurlike skoonheid te beklemtoon en nie te oorskadu nie.”

FOTO Instagram / Marciel Hopkins

Estelle het op Marciel se unieke kombinasie van blou oë en donker hare, haar pragtige vol lippe en haar gesonde vel gefokus wanneer sy haar grimeer het.

Daarom was minimale bedekking nodig, maar net so tikkie onderlaag om ’n mooi natuurlike en egalige voorkoms te skep wat songekus voor die kamera lyk. Estelle het warm, brons oogskadu skakerings gebruik om nóg meer fokus op haar oë te plaas.

“Ek het ’n donker oogomlyner bo-op haar ooglede aangewend om dit te laat uitstaan. So paar lae maskara laat haar wimpers voller lyk. Ons het baie pret gehad met kleurvolle lipstiffie, nie net om meer eenvoudige uitrustings kleur te gee nie, maar ook om aandag op haar lippe te plaas.” 

FOTO Instagram / Marciel Hopkins

Stap-vir-stap wenke om self Marciel se staatmaker-voorkoms te skep:

1. Berei jou vel met ’n vogroom en ’n basislaag voor.

2. Gebruik ’n dun lagie onderlaag om ’n egalige gelaat te skep. Estelle hou daarvan om ’n onderlaag wat klein bietjie warmer as Marciel se velkleur is, te gebruik om haar gesig op te helder.

3. Gebruik verbloemer wat ’n klein bietjie ligter as jou onderlaag is en wend dit onder jou oë, sowel as in die binne- en buitehoeke van jou oë aan. Skakeer dit met jou vinger of ’n sponsie in.

4. Skep diepte deur ’n verbronser diagonaal teen jou wangbene aan te wend (trek ’n denkbeeldige lyn van die bo-punt van jou oor na die buitehoek van jou mond en wend dit bo die denkbeeldige lyn aan). Verbronser kan ook teenaan jou slape, voorkop en aan die kante van jou neus vir ’n songekusde voorkoms aangewend word.

5. Wend blosser ook diagonaal bo die verbronser en teenaan jou wangbeen aan om ’n natuurlike rooskleurige voorkoms te skep. 

6. Kam jou wenkbroue in ’n opwaartse rigting om jou wenkbroue voller te laat lyk en vul dit liggies met ’n potlood, poeier of jel in. Hou jou wenkbroue mooi in plek deur ’n wenkbrou-jel  te gebruik.

7. Beklemtoon jou oë deur ’n neutrale oogskadu oor jou hele ooglid aan te wend. Definieer die buitehoek van jou oog met ’n donkerder skakering wat jy in ’n C-vorm tot by die eerste derde van die vou van jou ooglid aanwend. Wend dan ’n ligte kleur in die binnehoek van die oog aan om ’n wakker en oop voorkoms te skep.

8. Rond jou oë met die neutrale skakering teenaan jou waterlyn af. Wend dan oogomlyner bo-op jou ooglid teen jou wimperlyn aan.

9. Wend so paar lae maskara vir trefkrag aan. Moenie van jou onderste wimpers vergeet nie, dít laat jou oë groter lyk.

10. Kies ’n lekker donker- of helder lipstiffie om jou grimeervoorkoms mooi af te rond.

11. Spuit ’n laag grimeersproei oor jou hele gesig om seker te maak dat jou grimering langer hou. 

Estelle hou van:

Dior Backstage Rosy Glow in 001 Pink (R790)
Benefit 24-Hour Brow Setter (R460) By Edgars
essence You Better Work! Volume & Curl Mascara (R73)

Estelle se 4 haarstyl-idees

1) Pull-through braid

FOTO Instagram / Marciel Hopkins

Spuit die hare met ’n droë sjampoe om ekstra tekstuur te skep. Begin die hare by die kroon vleg sodat die vlegsel van voor af mooi sigbaar is. Onthou om klein deursigte haarrekkies te gebruik. 

2) Sagte los golwe

FOTO Instagram / Marciel Hopkins

Hare wat so dag of twee gelede gewas is, werk die beste vir dié voorkoms. As jou haarwortels olierig lyk, spuit so bietjie droë sjampoe om dit vars te laat lyk en boonop skep dit ekstra volume!

3) Sjiek en gladde poniestert

FOTO Instagram / Marciel Hopkins

Die maklikste manier om ’n gladde poniestert te skep is om jou hare met ’n haaryster reguit te stileer en dan ’n haarolie te gebruik om dit mooi glad en reguit te maak. Gebruik ’n sagte borsel met fyn borselhare om die hare glad te kam en spuit dit met haarsproei om die hare mooi in plek te hou.

Meer oor Estelle Pretorius ...

Estelle het in 2011 ’n kursus in grimering en hare in Stellenbosch voltooi. Daarna het sy ’n graad in binnenshuise ontwerp verwerf en by ’n argitekfirma in die Kaap begin werk. Kort daarna het sy die korporatiewe wêreld met haar passie vir grimering en hare verruil.

FOTO Instagram / Estelle Pretorius Muah
FOTO Instagram / Estelle Pretorius Muah

Bruide sit gereeld in haar grimeerstoel. “Elke bruid vertrou my volkome op hul groot dag en dít is ’n groot voorreg.”

As sy enige wenke aan toekomstige bruide kan gee?

1. Velsorg is baie belangrik - goeie grimering begin by ’n goeie “canvas”. Begin sommer vroeg met velsorgbehandelings! 

2. Indien moontlik, bespreek jou grimeer- en haartoetslopie vir dieselfde dag as wat jy jou rok pas, dan kan jy ’n goeie idee kry van hoe alles saam gaan lyk.

3. Geniet net elke oomblik van begin tot einde!