Sy word gewoonlik as die Springbok-losskakel Handré Pollard se vrou voorgestel, maar dié pragtige Paarliet het al self naam gemaak en op verskeie terreine haar eie plek gevind. 

FOTO Coetzer Cooke

Wie is Marise?

Met haar sonbruin, atletiese bou en donker stompgesnyde haarstyl, het jy beslis al iewers vir Marise Pollard op sosiale media opgemerk. Marise het in 2016 haar graad in grondslagfase-onderrig aan die Universiteit van Pretoria behaal. Sy en Handré het einde 2017 op die Cavalli Wine and Stud Farm die knoop deurgehaak - SARIE het eksklusief die troualbum gedeel.

Nou nog meer as ooit van te vore, besef sy die opdraende wat skoolleerders in die gesig staar as gevolg van die Covid-19-pandemie. “Dit is verskriklik wat hierdie siekte aan die wêreld en mense doen, ek glo en bid dat alles weer beter gaan raak.” Ja, onderrig en kinders bly steeds haar passie. En ’n beroep wat sy oorweeg om op die gepaste tyd eendag na terug te keer.

FOTO Instagram / Marise Pollard

Stilsit ken sy nie. Marise het al ondermeer model vir trots Suid-Afrikaanse handelsmerke soos Freedom of Movement en Burnt Studios gespeel. Boonop het sy ook al met die plaaslike velsorgreeks SKOON. Skincare gewerk. 

Sy ken die waarde van goeie velsorg. “Ek is mal oor velsorg en sonskerm is baie belangrik. Ek geniet dit om vir facials te gaan, maskers op te sit en goeie produkte te gebruik.”

FOTO Instagram / Marise Pollard

Ná ’n lekker somervakansie in Suid-Afrika, het die Pollards onlangs teruggekeer na Frankryk waar Handré vir die Montpellier Hérault-klub in die betowerende stad, Montpellier, uitdraf. 

Oor die vakansie verklap Marise: “’n Desembervakansie saam met vriende en familie beteken vir my en Handré ongelooflik baie en al is dit sleg dat hy beseer is, was dit ’n reuse voorreg vir ons om hier te kon wees. Tyd saam met ons vriende en familie was definitief die lekkerste en dan natuurlik die son, kreef en see.”

Hulle bly nou al net meer as ’n jaar in Montpellier en dié avontuurlustige paartjie geniet dit ten volle. “Dis definitief ’n groot aanpassing, maar ons altwee is baie optimisties van aard en maak die beste van elke situasie. Daarom geniet ons die lewe in Frankryk vreeslik baie."

Hoe lyk ’n gewone dag nou vir Marise?  “Dit bestaan uit huis skoonmaak, kook, oefen en kuier saam met vriendinne. Ons het ook ’n hondjie waarvoor ons baie lief is. Ek is natuurlik mal daaroor om te travel en doen dit soveel as moontlik.”

FOTO Instagram / Marise Pollard

Met ’n oop gemoed en dankbare ingesteldheid is Marise gereed om 2021 aan te durf.

“Ek herinner myself altyd om dankbaar te wees vir klein goedjies in die lewe en om die beste van elke situasie te maak. Dis só belangrik om net dankie te sê en te onthou dat God in beheer is. Dis maklik om negatief te raak met al die goed wat in die wêreld aangaan. Maar dis vir my egter belangrik om ’n positiewe invloed te wees ... ek geniet dit om mense lekker te laat lag en beter hulself te laat voel. Dís my mindset vir hierdie jaar, om ’n lig te wees.” 

FOTO Instagram / Marise Pollard

Op Marise se Instagram-blad is dit duidelik dat sy daarvan hou om die nuutste modes op die proef te stel. Sy is ook nie bang om ’n helder skakering op haar lippe te dra nie.

As dit by skoonheid kom, is haar benadering eenvoudig. “Ek glo definitief less is more en dat skoonheid van binne af kom. Ek glo ’n vrou moet doen wat vir háár werk en haar laat goed voel, want confidence is ’n groot faktor ten opsigte van skoonheid.”

FOTO Instagram / Marise Pollard

Destyds het ons haar met baie lang hare leer ken, maar nou verkies sy die korter, stompgesnyde styl. Dit verg min moeite en stilering, nes Marise dit verkies.

“Ek is glad nie iemand wat lank vat om klaar te maak nie, so ek glo in eenvoudige, natuurlike en volhoubare maniere.”

FOTO Instagram / Marise Pollard
FOTO Instagram / Marise Pollard

Marise hou van:

Heliocare Gelcream Color SPF 50 (R370) Beskikbaar aanlyn by www.dermastore.co.za

essence I Love Extreme Crazy Volume Mascara (R76)

Bobbi Brown Natural Brow Shaper & Hair Touch Up (R390)

SKOON. Wow-Wow Wonder Hydrating Serum (R500)