“Ek werk tans aan ’n projek om vrouens wat hulle eie klein besighede besit, te bemagtig," vertel Michelle, wat getroud is met die sanger en TV-aanbieder, Emo Adams.

"My seun James wil graag sy eie t-hemp-reeks met boodskappe van goedhartigheid begin waarmee ek hom gaan help én ek hoop dat my salon, The Mom Salon, nog meer sal groei,” brei sy uit.

Op haar Instagram-blad tussen al die plasings van haar, Emo en die pragtige vier Adams-seuns, deel Michelle dat sy nie net haar seuns grootmaak nie, maar hard aan die werk met haar eie besigheid is. Die hutsmerk #raisingbusinessesandbabies som dit mooi op. 

FOTO Instagram / Michelle Gildenhuys Adams

Ma-wees is uitdagend, maar die vreugde daarvan oortref die uitdagings. “Die absolute vreugde en liefde wat ek vir my kinders het, is die beste gevoel. Hulle is goedhartig, eerlik en beoefen onvoorwaardelike liefde. Ons as volwassenes kan so baie by hulle leer.”

Sy prioritiseer die balans tussen ma-wees en tyd vir haarself. Haar beker loop oor wanneer sy tyd maak vir vriende, koffie saam met haar ma, of lang gesprekke met haar suster. “Ek is ’n baie gelukkige ma en is baie lief vir my kinders, maar my fisiese- en geestelike gesondheid bly ’n groot prioriteit. As ek nie okei is nie, is my gesin ook nie okei nie.”

FOTO Instagram / Michelle Gildenhuys Adams

Haar raad vir ’n suksesvolle huwelik is drieledig: kommunikeer met respek, respekteer mekaar as individue wat gelyk is en wees onoorwaardelik lief vir mekaar. 

Michelle bewonder talle karaktereienskappe van haar man, Emo. “Hy is baie hardwerkend. Hy is nie bang om anders te wees nie. Hy behandel almal met respek, ongeag hul werkstitel of omstandighede. Hy verwag geen erkenning nie, sy passie is sy grootste dryfkrag.”

FOTO Instagram / Michelle Gildenhuys Adams

Michelle dra deesdae haar gryshare met trots. “Dit was moeilik. Ek het al op hoërskool begin gryshare kry. Tydens inperking was dit moeilik om ordentlike haarkleursel in die hande te kry en was alle haarsalonne se deure gesluit. Nadat ek wel my hare later weer laat kleur het, het ek een oggend toe ek weer my gryshare gewaar, die wilsbesluit geneem om nie weer my haarkapper te kontak nie en my natuurlike hare te omarm. Dít toets waarlik selfaanvaarding en dit herinner my daagliks om myself te aanvaar. Ek geniet hierdie persoonlike reis en weet nie of ek ooit weer my hare sal kleur nie!”

Wat is jou raad vir ander vroue wat ook hulle gryshare graag wil dra, maar nie die moed het nie?

“Dis baie moeiliker as wat ek gedink het. Jy sal self weet wanneer jy reg is om dit te aanvaar en met trots te dra. As jy oorweeg om dit self te probeer, doen dit! As jy enigsins dan voel dat dit jou nie gelukkig maak nie, kan jy dit weer laat kleur. Moenie laat die samelewing se idee van mooi en aanvaarbaar jou selfwaarde bevraagteken nie.”

FOTO Instagram / Michelle Gildenhuys Adams

The Mom Salon is nou ’n jaar oud. Hoekom is dit volgens jou belangrik dat besige ma’s steeds tyd aan hulself afstaan?

“Die salon is rondom die Engelse sê-ding ‘you cannot pour from an empty cup’ gebasseer. Ek weet wat ma's nodig het en daarom is die salon tot stand gebring. Daar word nooit oor die emosionele las wat ma's dra, gepraat nie. Ma's vorm die middelpunt van enige huishouding. Telke male is hulle geneig om alleen en minderwaardig te voel. My wens is dat die salon vrouens aan hulle veerkragtigheid herinner.”

Een behandeling wat jy vir elke vrou sal aanbeveel en hoekom?

“Beslis ’n manikuur en ’n bederf vir jou voete. Jou hande berei die kos voor wat jou gesin eet en jou voete dra jou na al die ongelooflike oomblikke wat jy met jou kinders deel. ’n Gesigbehandeling is ook noodsaaklik om te help om al die newe-effekte van slapelose nagte teen te werk.”

FOTO Instagram / Michelle Gildenhuys Adams

Jou 3 moet-hê haarprodukte?

Kadus Professional Velvet Oil (R315) Beskikbaar aanlyn by www.retailbox.co.za

Kadus Professional Repair Mask (R225) Beskikbaar aanlyn by www.retailbox.co.za


ghd Bodyguard Heat Protect Spray (R320) Beskikbaar aanlyn www.ghdhair.com