Vir sommige van ons is rooi lipstiffie die natuurlikste ding op aarde en vir ander weer heeltemal te gewaagd, of dalk net vir ’n spesiale geleentheid. Jou lipkleur kan ’n groot verskil maak aan hoe jy voel én hoe ander jou sien. Rooi lippe kan jou bui lig en beeldskoon laat voel. Hier is drie wetenskaplike redes hoekom jy rooi lipstiffie móét dra.

FOTO Instagram / Rouje

1. Mense dink jy is jonger 

’n Studie deur die mode-en-skoonheidshuis Chanel en sielkundiges van die Gettysburg College in Pennsylvania in die VSA het bevind dat rooi lipstiffie jou jonger laat lyk! Soos vroue ouer word, begin hul lippe en wenkbroue al hoe valer word. Hul oplossing? Dra ’n rooi lipstiffie om ’n groter kontras tussen jou lippe en jou gelaat te skep, want dié kontras laat jou in ’n kits jeugdiger lyk.

2.  Jy is gewilder by die werk

Vroue wat by die werk helderder grimering dra, word deur hul kollegas as vriendeliker en meer bevoeg beskou. Dít was die bevinding van ’n studie aan die Universiteit van Boston in die VSA. Vir die studie is mans en vroue gevra om na 25 foto’s te kyk van vroue met ligter en swaarder grimering aan. Die vroue met helder lip- en ooggrimering is deur die deelnemers as meer bevoeg en selfversekerd beskou as dié met minder of geen grimering nie. Iets so eenvoudig soos ’n treffende rooi lipstiffie kan wondere vir jou gemoed doen!

3. Jy voel meer selfversekerd ...

... en sal meer selfies neem (wat ’n goeie ding kan wees!). In ’n peiling deur die Amerikaanse skoonheidshuis CoverGirl in samewerking met die Harvard-universiteit onder 1 000 vroue is bevind dat diegene wat gereeld rooi lipstiffie dra, gemiddeld drie selfies per week op sosiale media deel. Dié vroue is baie meer selfversekerd as dié wat minder gereeld lipstiffie dra, hulle besit meer skoene en is meer geneig om uit te gaan!

FOTO Instagram / Rouje

Wenke om rooi lipstiffie te dra

Is jy soms bang om ’n helderrooi lipstiffie op jou lippe te dra? Moenie wees nie! Of jy helder kyk-na-my-lippe verkies of ’n sag en romantiese voorkoms, daar ís ’n rooi lipstiffie vir elkeen. Volg ons raad en kies die rooi lippe wat die beste by jóú unieke styl en voorkeure pas.

FOTO Instagram / Rouje

Rooi lippe met ’n mat-afwerking

Jy hou van: Treffende en gedefinieerde lippe

’n Helderrooi lipstiffie met ’n mat-afwerking is klassiek en supersjiek. Die kleur is intens en hou lank op jou lippe. Boonop voel die nuwe formules nie droog op jou lippe soos in die verlede nie. Dis eerder sag en bevogtigend.

Charlize Theron FOTO Getty Images / Gallo Images

’n Romerige rooi lipstiffie

Jy hou van: Rooi lipstiffie met subtiele glans

Lipstiffies met ’n romerige formule is sag en bevogtigend op jou lippe met ’n subtiele glansafwerking. Danksy die formule wend dié lipstiffies gewoonlik maklik aan - perfek vir wanneer jy minder tyd het om aan jou grimering te spandeer. ’n Waaghalsige rooi

Emma Stone FOTO Getty Images / Gallo Images

Waaghalsige rooi

Jy hou van: Meer waaghalsige lippe en om te eksperimenteer met verskillende skakerings van rooi.

’n Rooi lipstiffie met ’n bruin, swart of donkerpers ondertoon is veral dié seisoen in die kol en werk goed vir ’n aandvoorkoms. Boonop pas donkerder rooi skakerings by byna alle gelaatskleure, daarom is daar geen rede om nié so ’n skakering te probeer nie.

Emily Blunt FOTO Getty Images / Gallo Images

Rooi en ultra-glansend

Jy hou van: Glansryke rooi lippe wat blink

Vir glansryke volkleur lippe soos Taylor Swift is ’n lipglans of helderrooi lipstiffie met 'n blou ondertoon perfek.

Taylor Swift FOTO Getty Images / Gallo Images

Gevlekte rooi lippe

Jy hou van: ’n Romantiese en meer subtiele lipstiffie-voorkoms

Vir subtiele rooi lippe, wend ’n tikkie rooi lipstiffie aan die middel van lippe aan en gebruik dan jou vinger om dit oor die res van jou lippe te skakeer. Jy kan ook ’n tikkie deursigtige lipglans (of lip-ice) bo-oor jou lipstiffie aanwend en jou lippe saampers om die kleur sagkens te versprei.

Dakota Johnson FOTO Getty Images / Gallo Images

Probeer dié rooi lipstiffies:

FOTO Instagram / Rouje

1. L'Oréal Paris Liquid Lipstick Lip Paint Matte in Apocalypse Red (R160)

2. Revlon Super Lustrous Lipstick in Love Is On (R159)

3. Wet n Wild Silk Finish Lipstick in Cherry Frost (R44)

4. Elizabeth Arden Plush Up Lip Gelato in Poppy Pout (R295)

5. Dior Rouge Dior Liquid Metal in Poison Metal (R600)

Bronne: www.allure.com, www.medicaldaily.com, www.nytimes.com, www.instyle.com