Stephanie Baartman

Stephanie Baartman vertolk die rol van Bibi in die kykNET-sepie Getroud met Rugby. FOTO Stephanie Baartman

Die aktrise Stephanie Baartman is bekend vir haar rol as skoonheidsalon-bestuurder, Bibi, in die gewilde kykNET-sepie Getroud met rugby. Nes Bibi is Stephanie ’n ding of twee wys wanneer dit by skoonheid kom.

Wat is haar grootste haaruitdagings? “My hare is kort en natuurlik en net soos baie mense met my tipe hare, droog dit vinnig uit en breek af.” 

Stephanie se doepa vir gesonde hare

Sy benadruk die belangrikheid van natuurlike olies as dit by die versorging van haar hare kom.

“Ek gebruik ’n mengsel van klapperolie, olyfolie en aloe vera (sommer uit my tuin), kook dit saam en wend dit dan aan my hare twee maal ’n week. Ek spoel dit ná so 20 minute af, dit werk goed as ’n voedende masker. Dit hou my hare lekker bevog en help om my hare vinniger te laat groei.”

FOTO Instagram / Stephanie Baartman

Vashti Prins

FOTO Instagram / Vashti Princw

Vir talle Suidooster-aanhangers voel Vashti Prins al soos familie, want weeksaande vertolk sy die rol van Danny, ’n ambisieuse krulkop, in die fiktiewe Kaapse woonbuurt, Ruiterbosch. En ja, hulle is soos vinkel en koljander. “Ons is eintlik baie dieselfde ...behalwe, ek flirt en soen meer!” het sy skertsend in ’n vorige onderhoud verklap.

Vra maar enige vrou met krulhare, dis ’n alewige stryd om seker te maak dat jou krulle mooi gedefinieerd bly. En as dit jou kenmerkende look is, moet jy weet hóé om hulle te beheer. Gelukkig weet Vashti wat vir haar hare werk en het die fynere kuns van mooi krulle al goed bemeester.

Vashti se 3 haarwenke

1. Beperk hittestilering.

2. Jy het nie noodwendig duur haarprodukte vir jou krulle nodig nie.

3. Trek jou vingers versigtig deur jou hare en doen moeite om met jou vingers elke krul te definieer.

FOTO Instagram / Vashti Prins

Robyn Rossouw

Robyn Rossouw is tans te sien in die SABC2-reeks Swartwater. FOTO Clarissa

Met haar vertolking as Monique Ross in kykNet & kie se Afrikaanse telenovelle, Arendsvlei, het Robyn Rossouw gou haar plek op die kleinkassie volgestaan. Nou is sy in die SABC2-reeks Swartwater te sien.

Sy is gaande oor haar werk as aktrise, maar die gepaardgaande kommentaar op sosiale media van kykers wat haar met valkoë dophou, bly uitdagend. 

Haar geheim om haar krulle mooi gedefinieerd te laat lyk? Ryswater! Ryswater werk soos ’n bom om proteïene in jou hare te sit, dit versterk jou hare, jou krulle is meer gedefinieerd en jou hare groei ook ongelooflik vinnig! Ek kan nie genoeg daaroor praat nie!

Robyn se ryswater-resep:

1 koppie rys

2 koppies water

1 groot plastiekhouer met ’n deksel

1 spuitbottel

Stap-vir-stap metode:

1. Spoel die koppie rys met een koppie water vir so 10 sekondes in die plastiekhouer skoon. Dreineer die rys.

2. Gooi nou weer ’n koppie water by die rys en maak die bak met die deksel toe.

3. Los dit vir 24 uur.

4. Sit die ryswater in die spuitbottel.

Ryswater-metode vir jou hare:

1. Was jou hare deeglik met sjampoe en opknapper.

2. Kam jou hare uit en verdeel in werkbare gedeeltes.

3. Sproei die ryswater op jou kopvel en vryf dit in jou kopvel in.

4. Herhaal dieselfde proses met jou haarlengtes.

5. Seël jou hare met byvoorbeeld ’n plastieksak ok kleefwerende plastiek vir so vier ure.

6. Verwyder dit en spoel eers jou hare na so 10 ure met koue water af.

 Onthou ...

  • Dié doepa het ’n vreemde, gefermenteerde reuk. Beplan daarom mooi wanneer jy hierdie proses wil uitvoer.
  • Herhaal elke tweede week.
  • Gebruik elke keer ’n vars, nuwe mengsel.  
FOTO Instagram / Robyn Rossouw