Sue Duminy se daaglikse doenlys is propvol en die konstante gejaag is iets waaraan sy al te gewoond is. Maar tog probeer die voormalige model, ma en sakevrou die mooi raak te sien. 

FOTO Instagram / Sue Duminy

In 2020 het ons gesien hoe belangrik dit is om op jou gesondheid en welwees te fokus. Sue probeer alyd oefening te prioritiseer, gelukkig is sy lief daarvoor om aktief te wees. 

“Ek het provinsiale hokkie op hoërskool gespeel, so oefening en om gesond te eet was deel van my lewe vanaf ’n jong ouderdom. Toe ek JP ontmoet het, was dit vir my so lekker om nou weer by hom te leer en in te skakel by sy oefeninge en eetprogram. Ons motiveer mekaar lekker! Ek is mal oor kosmaak en veral om gesonde kos vir die hele familie lekker te laat smaak.”

Haar mentor en beste vriendinne

Sy en die Protea-krieketster JP Duminy, wat in 2011 getrou het, spog met twee pragtige krulkop-dogtertjies, Bella en Alexa Rose. Sue beskou hulle as haar ‘beste pêlle’. “Ons doen alles saam: Ons giggel en ons is laf en ons gaan op uitstappies en lunch dates! Ons trek lekker laf aan en verf ons naels en toets elke lipstiffie skakering!”

FOTO Instagram / Sue Duminy

Sue kan nie haar lewe sonder JP indink nie - hy is immers haar mentor en steunpilaar. “Hy sien altyd die mooi in almal en alles raak. Hy het so mooi hart - hy is eerlik en opreg, ” sê sy. “JP is ’n sout-van-die-aarde-mens, almal wil net altyd by hom wees. Sy geselskap is diep en betekenisvol. Hy inspireer jou om ’n beter mens te wees. Hy laat jou die groter prentjie sien as dinge bietjie druk raak.”

FOTO Instagram / JP Duminy

Die aanlyn-boetiek Opari hou haar óók besig. “Ons is nou al omtrent 5 jaar aan die gang en groei teen ’n vinnige tempo!” Verder behartig sy bemarking op sosiale media vir verskeie besighede. 

Lagplooie en meer

Sue is ’n natuurlike skoonheid. Sy benadruk dat dit oor veel meer as net die uiterlike gaan. “Skoonheid kom van binne en buite, ek glo ook jou emosionele welstand het ’n direkte invloed op jou voorkoms en vel.”

FOTO Instagram / Sue Duminy

Dit gaan vir haar beslis nie oor ’n vlekkelose vel sonder plooie nie.  “Skoonheid is byvoorbeeld ’n ouer vrou wat mooi na haarself kyk, wat lagplooitjies het, iemand wat gelukkig en fulfilled is.”

Skoonheidsaanvullings is nou orals te koop en baie gewild. Sue is self ’n aanhanger. “Ek moes eers die produk uittoets en sien of ek ’n verskil kon agterkom. Na noukeurige ondersoek is dit duidelik dat kollageen goed vir velelastisiteit werk en om ligamente sterker te maak. Ek kon definitief na ’n maand sien dat my vel meer plomp en glansend lyk.”

FOTO Instagram / Sue Duminy

3 vinnige skoonheidsvrae:

1. Jou 3 moet-hê skoonheidsprodukte en hoekom?

1. Optiphi Facial Cleanser (R840)

Dit bevat salisielsuur wat ’n probleemvel en onegalige tekstuur help reguleer.

2. Wimper-verlengings

Dit verander jou hele voorkoms. Dit laat my oë pragtig uitstaan en geen ander ooggrimering is dan nodig nie!

FOTO Instagram / Sue Duminy

3. ghd Helios Hair Dryer (R2 900)

Dit maak my hare in ’n kits droog!

2. Wat is jou gunsteling vel- of haarbehandeling en hoekom?

Ek is mal oor micro dermabrasion. Dit skraap die boonste dooie velletjies af en maak jou gesig net lekker skoon en glansend.

3. Wenke vir ander besige ma's as dit by skoonheid kom?

  • Maak seker jy gebruik goeie kwaliteit produkte, gebruik eerder minder produkte wat werklik ’n verskil gaan maak aan jou vel as jy dit gebruik.
  • Maak tyd vir jouself. Jy moet jouself prioritiseer, al is dit om jou hare of naels te doen of self net in die bad te lê met ’n tuismasker. Jy gaan beter voel en as mamma beter voel is almal in die huis happy
  • Drink water! Ek dink nie daar is enigiets beter vir jou vel as vars water nie. Jy sal ’n groot verskil in jou vel sien.