Voor én agter die kamera pak Willem Botha alles met passie en entoesiasme aan. Jy sal hom nooit moeg of afgemat sien nie. Voor ’n gehoor, agter ’n kamera of wanneer hy self ’n onderhoud met iemand voer, gee hy waarlik álles.

Dié Riversdaller staan sowaar verskeie rolle vol: Sanger, TV-aanbieder en fotograaf. Die verkleurmannetjie van die kunste. “My ma het ’n sterk kunsklap, dis seker waar ek dit kry.”

Maar dis nie al nie, hy hou sy lyf ook grimeerkunstenaar.

So van waar die passie vir grimering? Dit het als met die sangeres Leah begin.

Die Afrikaanse sangeres en TV-aanbieder Leah was die eerste bekende in Willem se grimeerstoel. FOTO Willem Botha

“Leah het reklamefoto’s nodig gehad, maar ’n grimeerkunstenaar vra tot R3 000. Ek het in haar baie leë makeup-sakkie gedelf en haar hele oog met ’n oogpotlood geskakeer,” vertel hy.

Hy het alles op YouTube geleer – selfs die kuns van haarstilering.

“Só het ek begin vertroud raak met tegnieke en produkte. Jy moet nou my kit sien, dis twee keer die grootte.”

Vanjaar het Willem besluit om 21 grimeerklasse oor die hele Suid-Afrika aan te bied, saam met die Suid-Afrikaanse grimeerhuis MUD. Hy het tot ’n pallet saam met hulle uitgebring - MUD The Chosen Collection (R799). Vatso Kylie Jenner!

Die SARIE-skoonheidspan het een van die grimeerklasse bygewoon. En raai wie was toe in sy grimeerstoel? Jonadrie van Aardt, SARIE se eerste Nuwe Gesig-wenner.

FOTO Nicolette Kapp

Willem se 10 grimeerwenke

1. Blending

Willem sê: Dis vir my verskriklik belangrik. Blendingblendingblending! Hoekom? Sodat dit mooier en egalig vertoon, maar óók sodat dit nie maklik kan afkom nie.

2. ’n Basislaag vir houkrag

Willem sê: Neem ’n klein hoeveelheid basislaag en vryf dit oor jou hele gesig en werk dit lekker in jou porieë in. Jy berei die vel voor sodat jou grimering glad nie rondskuif deur die loop van die dag nie. Dit help nie jy stap die oggend 08:00 uit en dan teen die aand wanneer jy 17:00 terugkom sit die makeup op jou knieë nie.

3. Onderlaag aanwending

Willem sê: Moenie strepe vee oor die vel nie, druk dit in die vel in met klein bewegende sirkels. Só sal jou onderlaag langer hou en mooier vertoon.

4. Seep vir jou wenkbroue

Jy lees reg! Willem sê: Dis die sterkste wenkbrou-jel wat ek al in my lewe ontdek het. Boonop is dit jou antwoord vir ‘Bushy brows’ – nou ’n gewilde skoonheid-tendens (lees meer hier). Dit skep ’n ongetemde, jeugdige voorkoms. Jy het nie van nature ruie wenkbroue nodig om dié voorkoms te skep nie. Spuit ’n bietjie grimeersproei op ’n koekie seep en vee ’n wenkbrouborsel daaroor. Kam dan jou wenkbroue skuins opwaarts. Die wasagtige tekstuur van die seep werk net so goed soos ’n wenkbroujel om jou wenkbrouhaartjies voller te laat lyk en te keer dat die haartjies platval. 

5. Opwaartse bewegings

Willem sê: Wanneer ek iemand grimeer, maak ek van opwaartse bewegings gebruik. Vroue is geneig om alles in afwaartse bewegings te grimeer. As jy byvoorbeeld jou wenkbroue met afwaartse bewegings grimeer, gaan dit lyk of jou oë hang.

FOTO Willem Botha

6. Wend ooggrimering van buite na binne toe

Willem sê: Begin altyd van buite af na binne toe werk. Jy wil nie ’n opeenhoping van oogskadu in die binnehoeke van jou oë hê nie. Jy moet onthou om met sirkelbewegings die oogskadu uit te skakeer na buite toe.

7. Twee oogskaduborsels is ’n moet

Willem sê: Dis eenvoudig, jy benodig een vir ligter skakerings en een vir donker skakerings.

8. Oogskadu as oogomlyner

Willem sê: Gebruik ’n hoekige borseltjie en donker oogskadu in plaas van vloeibare oogomlyner om jou oë mee te omlyn. Dit vertoon nie so hard nie en wend baie makliker as vloeibare oogomlyner aan.

9. Moenie jou haarlyn afskeep nie

Willem sê: Ek hou daarvan om die orige onderlaag op die onderlaagborsel effens in die haarlyn in te skakeer. Andersins sit jy met hierdie spierwit kop wat nog nooit die son gesien het nie. Dit help sodat daar geen definitiewe lyn is nie.

10.  Kontoerlyne

Willem sê: Die doel van contouring is nie omdat almal dit doen moet ek dit ook doen nie. Die doel van contouring is om dit wat groter is, kleiner te maak en dit wat jy wil uitbring, na vore toe te kan bring. Dit werk lekker as jy byvoorbeeld jou voorkop kleiner wil laat vertoon, as jy jou neus smaller wil laat lyk, jou kakebeen meer wil uitbring of as jy lekker wangbene wil skep.


Kyk net hoe mooi lyk Jonadrie:

FOTO Willem Botha