Onthou, #JyIsGenoeg. Elke mens beskik oor ’n unieke skoonheid en fotografie is een manier waarop dit uitgebring kan word.
- Rus goed voordat jy voor die kamera verskyn.
- Benader jou fotosessie met selfvertroue. As jy angstig voor ’n kamera voel, werk eerder daaraan om daardie emosies in opwinding en selfvertroue te omskep en jy sal die resultaat in die foto’s sien.
- Hou dit eenvoudig, maar fokus op ’n sterk postuur.
- Kyk na foto’s in tydskrifte en oefen voor die spieël om die regte posisie te kry.
- Maak seker jou hare lyk reg vir jou en dra klere wat jou goed laat voel.
- Weet wat jou sterkste bates is (byvoorbeeld jou oë, jou skouers, jou hande) en laat dit die fokus wees.
- Druk jou skouers terug sodat jy nie vooroorgeboë lyk nie.
- Hou jou arm weg van jou lyf, net effentjies, om te verhoed dat jou foto’s plat en rigied lyk.
- Waar moontlik, hou jou middellyf oop.
- Die kamera tel baie meer detail op as wat jy met die blote oog sien.
- Naels moet goed versorg wees.
- En skeer of waks maar gerus as jy ’n vollengte foto instuur waar jou bene sigbaar is.
Moenie vergeet om pret te hê terwyl die kamera voortklik nie!
Tyd vlieg. Dit voel soos gister dat beplanning vir die kompetisie SARIE Nuwe Gesig vir ons jonger lesers gedoen is – en hier soek ons nou al die derde Nuwe Gesig!
Dit is ook tyd om die 14de* wenner van SARIE Voorbladgesig, in trotse samewerking met Isa Carstens Akademie, te vind. Sedert die kompetisie in 2011 begin is, het lesers vir ons gewys hulle glo in die mantra #JyIsGenoeg deur in hul duisende in te skryf.
Hierdie is ’n geleentheid om jou storie te deel en ander te inspireer. Skryf in, jy is dit werd.
* Twee jaar, 2016 en 2017, het elk twee wenners opgelewer.
SARIE Voorbladgesig en SARIE Nuwe Gesig: Hier’s jou reëls
