Dis onmoontlik om my ma (Adri Troskie Vivier) se impak op te som. Sy het my van kleintyd af blootgestel aan teater, dans, kuns, die TV- en filmbedryf, die buitelug en sport. My ma het my gewys hoe jy met oorgawe leef. Sy sit in my beendere, in my bloed. Ek is omdat sy is.
Ek word op ’n daaglikse basis deur vroue geïnspireer, vriendinne sowel as vreemdelinge. En wat my dikwels tref, is hul deursettingsvermoë en onuitputbare lus vir die lewe. Soos my een vriendin, Jacobi, wat die lekkerste lag het . . .
Sy gaan haal daai lag so diep vanuit die aardkors . . . sy en my (aktrise-)suster, Trix (Vivier). Solank as wat jy saam met die mense rondom jou kan lag en jou humorsin behou, is die lewe goed. Selfs al gooi die lewe soms onvoorsiene uitdagings op ons pad.
