Op honderd wil sy steeds nuwe dinge leer en ervaar en opgewonde wees oor die lewe.
Kafeïenvrye latte in die hand, gesels aktrise, vervaardiger en draaiboekskrywer Donnalee Roberts in die Chocolat Bistro in Durbanville, waar dit gesellig gons. Asof só gestileer, pas sy in by die ouwêreldse dekor in haar geblomde hoënek-rok, Alice in Wonderland-kopband en roomkleur stewels.
Haar rok is deel van haar klerereeks, The Romantic Collective. Dié aanlyn besigheid het goed gevaar tydens die pandemie. As sy nie in die filmbedryf was nie, bieg sy, was sy modeontwerper. “Ja, die ewige romantikus, dis ek.” Mooi rokke met gedrukte patrone laat ons eie Julia Roberts-ewebeeld breed glimlag.
