Rocco en Lizz Meiring het naam gemaak in twee uiteenlopende wêrelde. Hy rig ons Olimpiese kampioen Tatjana Schoenmaker en van die beste swemmers in Suid-Afrika af. Sy is ’n veelbekroonde aktrise, skrywer, regisseur en kunste-kampvegter.
Hy staan soggens douvoordag langs die swembad in Pretoria. Sy dink dikwels in die middernagtelike ure in haar huis in Johannesburg van haar kreatiefste planne uit.
Maar as dit by werksetiek kom, staan dié broer en suster se kop in dieselfde rigting: Jy doen ’n ding ordentlik.
