2022 was vir hierdie pragtige vrou ’n ongelooflike jaar in alle fasette van haar lewe. “Ek het my besigheid uitgebrei, wat al vir baie lank ’n droom in my hart is. Ek het myself uitgedaag en vir SARIE Voorbladgesig ingeskryf en op soveel vlakke gegroei. Ek vind nog my nuwe balans om al die balle in die lig te hou, maar ek geniet elke oomblik!”
Sy is dankbaar vir haar onvergeetlike reis met SARIE Voorbladgesig. Dit is ’n ervaring wat haar altyd sal bybly. “Ek was redelik selfversekerd dat ek die mantra #jyisgenoeg glo en tog was ek met oomblikke gekonfronteer met die vraag: ‘Is ek werklik genoeg?’.”
Dit het vir Jean-Mari nogal onkant gevang. “Ek het dit nie besef tot ek in die proses was nie. Ek het werklik ondersoek ingestel en daardie onsekerhede wat diep binne myself lê, opgegrawe en moeite gemaak om vry te kom daarvan.”
