“Ek onthou ek en my ouma het hierdie boek saam gelees in die middae. Ons het die eerste drie boeke van Ansofie Plak, wat deur Anna Emm geskryf is, gelees. Daarna het ek ook ander boeke op my eie begin lees en dit geniet. Ek hou van romantiese en grapperige stories,” vertel Lana.
“Op die oomblik is ek besig om Omnibus 3 van die Elle-reeks deur Christien Neser te lees. Ek is reeds klaar met die eerste twee boeke. Ek kan nie wag vir nog van Christien se boeke nie.
“Ek het ook die hele reeks boeke van Lotta se lewe gelees, en dit baie geniet. Dis in Afrikaans vertaal deur Kobus Geldenhuys. Die oulike sketse deur Alice Pantermuller maak dat ek ’n Lotta-boek nie kan neersit as ek dit eers begin lees nie.
“Natuurlik het ek ook al heelwat van Jaco Jacobs se boeke gelees. Ek dink hy is my gunsteling-skrywer. Hy skryf verskillende tipe boeke, grapperige stories, avonture en selfs romantiese stories.
“Sy boeke is altyd interessant en dit voel vir my of ek deel word van die storie en dan wil ek nie ophou lees totdat die boek klaar is nie.”
As Lana nie besig is om te lees nie, is sy bedrywig op die sportveld. Sy neem deel aan atletiek, landloop, netbal en sagtebal. As sy vrye tyd het, hou sy ook daarvan om na musiek – liedjies met ’n lekker ritme – te luister.
Maar sy steek ook nie lyf weg as dit by skoolwerk kom nie, want sy het nie net een gunsteling-vak nie; sy hou van Wiskunde, Geskiedenis en Natuurwetenskap.
Lees hieronder Lana se indruk van die boek wat sy onlangs gelees het:
‘Felina Kat, geheime agent’, Louise Smit met illustrasies deur Zinelda McDonald (Human & Rousseau, *R150)
Speurder Skote Petoors kort hulp om ’n gesteelde blou diamantring terug te vind. Hy kontak ’n geheime agent, ’n kat met die naam Felina wat een geel en een groen oog het.
Felina en Timo soek saam na die misdadigers wat die blou diamantring gesteel het.
Timo en Felina ontmoet, omdat hul in dieselfde woonstelgebou bly. Timo is ’n slim seun wat sy oë en ore oophou, want hy wil graag eendag ’n speurder word. Daar is ook ’n verdagte tweeling, weet hulle dalk iets?
Het jy geweet ’n blou diamant word in die diepste laag van die aardkors gevorm?
Ek het die boek geniet en het heeltyd gewonder wat volgende gaan gebeur. Lesers wat van avontuur hou, sal Felina Kat, geheime agent geniet. Daar is oulike illustrasies wat die boek interessant maak.
