Kompleksiteit van romantiese verhoudings bekyk in boeiende roman

akkreditasie
0:00
play article
Intekenare kan na hierdie artikel luister
Yasmin Ghorami glo haar ma en pa se huwelik is uit liefde gebore. Dit was nie, soos die tradisionele gebruik in Indiese families, ’n gereëlde huwelik nie. Is dit dalk die rede waarom Yasmin idealisties oor haar eie liefdesverhouding is? Maar is haar ma en pa se huwelik werklik so liefdevol soos Yasmin glo?

In die boeiende roman, Love Marriage (Virago, *R360), beskryf Monica Ali die kompleksiteit van romantiese verhoudings op so ’n manier dat jy self met ander oë na romantiese liefde kyk.

Wat trek mense aan na mekaar en waarna soek hulle in ’n verhouding en is daar onderliggende ervarings uit hul verlede wat hul ervaring van menslike konneksies onbewustelik beïnvloed?

Die skrywer Monica Ali.
Die skrywer Monica Ali. Foto: Wikipedia.

Yasmin het in die spore van haar pa, ’n mediese dokter, gevolg. Sy probeer om die perfekte dogter vir Shaokat te wees, want haar rebelse broer, Arif, het ’n uiters gespanne verhouding met sy pa.

Arif is ook ’n toegewyde Moslem wat gereeld die moskee besoek in teenstelling met die res van die gesin. Shaokat glo Arif doen dit net om hom te irriteer.

Anisah, Yasmin se ma, ondersteun haar seun, al lyk dit of haar eie verhouding voldoen aan die maatstawwe van ’n ‘goeie’ Indiese verhouding – sy is onderdanig aan haar man, sy werk nie, vertroetel haar gesin met tradisionele Indiese geregte en doen goeie dade in die woonbuurt waar hulle woon.

Daar is ’n paar verwikkelinge wat Yasmin, sowel as Anisah, se rolle op sy kop keer. Arif se meisie is swanger en dit laat Anisah kant kies tussen haar eggenoot en haar seun.

Yasmin raak ontgogel oor haar eie verhouding met die aantreklike jong dokter, Joe Sangster. Hulle is verloof en beplan hul troue, alhoewel dié verhouding meer platonies van aard is, sonder enige openlike seksuele ondertone.

Wanneer kuise Yasmin uitvind Joe ondergaan in die geheim terapie vir sy seksverslawing, laat dit haar ’n klandestiene seksuele verhouding met ’n kollega aanknoop. Tog beur sy voort met die trouplanne.

Joe reël dat die Ghorami’s vir ’n ete na sy boheemse ma, Harriet, se huis kom in die gegoede buurt waar sy woon, sodat die ouers mekaar kan ontmoet.

Harriet is alles wat Anisah nie is nie en Yasmin is bevrees dat haar konvensionele ma geskok sal word deur Harriet, ’n uitgesproke en omstrede feminis wat daarop uit is om die maksimum publisiteit te kry om feminisme in die kollig te hou.

Verbasend genoeg vind Anisah aanklank by Harriet, wat haar aanmoedig om vir haarself op te staan rakende haar seun.

monica ali, love marriage

Terwyl Yasmin self konflik ervaar tussen haar ou identiteit as pligsgetroue en gehoorsame dogter teenoor haar nuwe waaghalsige identiteit, kom sy aanvanklik nie agter dat Anisah voor ’n krisis in haar huwelik te staan kom nie.

In die verhaal ondersoek die skrywer kultuurverskille subtiel deur hoe die karakters liefde benader en deur die tradisionele perspektiewe af te speel teen die onkonvensionele en meer liberale benadering tot liefde.

Maar sy wys dit ook in hoe mense praat, die aksent wat hulle gebruik en die vooropgestelde stereotipering wat verskillende rasse oor mekaar het.

Tog bly een ding soos ’n paal bo water staan; almal ervaar wroeging in hul verhoudings en word tot nuwe insigte gedwing daardeur.

Wie ons is en hoe ons liefhet is die deurlopende tema waarop die verhaal gebou is. Verhoudings én die liefde is kompleks. Verwagtinge oor liefde verskil meesal van die realiteit oor die liefde, en dan is daar boonop die kompromieë wat jy aangaan ter wille van die mense waarvoor jy lief is.

Ali het die vermoë om jou te laat lag en huil saam met die karakters. Jy ervaar ook empatie vir elkeen, maak nie saak hoe gebroke en vol geheime hulle is nie.

Dié menslike verhaal word met deernis vertel en lei die leser om met nuwe oë na gewone dinge te kyk.

* Prys onderhewig aan verandering sonder vooraf kennisgewing

JONGSTE UITGAWE

Januarie/Februarie-uitgawe

JONGSTE UITGAWE
SARIE is dié glanstydskrif van die Afrikaanssprekende vrou van Suid-Afrika.
Begin lees
Nuusbriewe: Registreer gratis

Registreer vir ons nuusbrief en bly op hoogte van die jongste SARIE-nuus.

Klik vir nuusbriewe
SLIMMER MET SARIE

Tuiskokke, raak slimmer met SARIE!

SLIMMER MET SARIE
Skerp jou vaardighede op met Herman Lensing se kookkursus.
Sien meer
SARIE BRUID: (VER)KOOP MY ROK EN ANDER DIENSTE
SARIE BRUID: (VER)KOOP MY ROK EN ANDER DIENSTE
Splinternuut! Nou kan jy ander bruide inspireer met jou trourok, -produk of -diens. Of inspirasie vir jou droomtroue binne die SARIE-wêreld kry.
Begin lees