Met die wye reeks grimeerprodukte tot ons beskikking, is dit soms oorweldigend om te kies wat werk en hoe om dit korrek te gebruik. Soos wat jy jou gunstelinge vind en so ’n paar oulike truuks korrek toepas, is dit te lekker om jou grimeervoorkoms in die spieël te gewaar.
Maar hoe gemaak met staatmaker grimeerprodukte soos blosser, verbronser én verligter? Wat kom eerste en waar presies op jou wange moet jy dit aanwend?
“Ek kom nogal agter dat mense weet nie presies hoe om dit te doen nie,” sê Alicia Buckle, grimeerkunstenaar en haarstilis van Kaapstad asook eienaar van die Alicia Buckle Skool van Grimering en Haarstilering. Ons kies gewoonlik die verkeerde kleur, veral as dit by verbronser kom.
