FOTO Marijke Willems
Tana Ferreira, Voorbladgesigwenner 2012, het in 2018 weer vir SARIE model gespeel.
Sy het in ons Augustus-uitgawe van daardie jaar op die skoonheidsblaaie verskyn en met haar blou oë, ligblonde hare en vlekkelose vel is sy eenvoudig beeldskoon.
Vir die fotosessie is haar grimeervoorkoms natuurlik gehou, maar met ikoniese rooi lippe afgerond. Die SARIE-skoonheidspan het met Lesley Whitby, ons grimeer- en haarkunstenaar vir die sessie, gesels oor hoe om dié treffende voorkoms te kry.
Die geheim? “Dit verg ’n bietjie ekstra moeite, ’n gesonde vel, goed versorgde wenkbroue en pragtige lippe,” sê Lesley.
FOTO Marijke Willems
Volg dié wenke:
Vir jou oë ...
- Kies ’n natuurlike oogskadu en wend dit oor jou hele ooglid aan.
- Gebruik vloeibare oogomlyner om ’n dun lyntjie net bokant jou wimperlyn te trek.
- Gebruik ’n wimperkruller om jou wimpers te krul en wend minstens twee lae maskara aan vir lang, welige wimpers.
- Vul jou wenkbroue met ligte strepies in om ’n natuurlike, voller voorkoms te skep.
Vir jou wange ...
- Kies ’n blosser in ’n sagte, natuurlike skakering en wend dit op jou wangbene aan.
Vir jou lippe ...
- “Die beste manier om rooi op jou lippe te dra, is om ’n lipborseltjie of lipomlyner te gebruik,” verklap Lesley. Dit sal help om ’n goed gedefinieerde lipvoorkoms te skep wat nie maklik sal smeer nie.
FOTO Marijke Willems
Skryf nou in!
Lees meer oor hoe om in te skryf hier. Skryf in vir SARIE Voorbladgesig en SARIE Nuwe Gesig aanlyn by voorbladgesig.sarie.com.
SARIE Voorbladgesig en SARIE Nuwe Gesig word met trots geborg deur Isa Carstens Akademie.
