Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
SuperRugby
‘Stryd teen Boland die risiko werd’

Hoewel hy styf sal duimvashou dat geeneen van sy Springbokke in die slag bly wanneer die Stormers Vrydagaand hul voorseisoense voorbereiding met ’n wedstryd teen die Boland in Wellington afsluit nie, glo Robbie Fleck dié kragmeting is onontbeerlik.

Die Springbok-vaskopstut Frans Malherbe sal die Stormers se skrum anker in Vrydagaand se wedstryd teen die Boland-Kavaliers in Wellington. Foto: Gallo Images

Die Kapenaars se afrigter sê dis belangrik dat spelers soos Damian de Allende, Pieter-Steph du Toit, Siya Kolisi, Frans Malherbe, Bongi Mbonambi en Steven Kitshoff wedstryd-oefening kry voor volgende Saterdag se Superrugby-kragmeting met die Bulle in Pretoria.

“Hulle het vir vyf weke lank kondisionering gedoen en dit was altyd die plan om hulle in hierdie wedstryd te laat begin,” sê Fleck.

Oor die gevaar van beserings opdoen, is Fleck filosofies.

“Dis altyd daar, maar jy loop ook tydens oefensessies daardie gevaar. Jy moet hulle die kans gee om duikslae uit te voer, van die grond af op te spring en ongelooflik hard te werk.”

Fleck het straks drie van sy voorkeur-kombinasies vir volgende week se kragmeting in Pretoria gekies. Daar’s die Springbok-voorry van Kitshoff, Mbonambi en Malherbe, ’n lostrio van Kolisi, Du Toit en Sikhumbuzo Notshe, en ’n senterpaar van Damian de Allende en Ruhan Nel.

Dillyn Leyds, Seabelo Senatla en Sergeal Petersen is weens ligte beserings nie vir die agterste driehoek oorweeg nie. Fleck het egter die versekering gebied dat hulle fiks gaan wees.

Dieselfde geld die skrumskakel Jano Vermaak.

Damian Willemse sal waarskynlik die eerste uur teen die Boland speel voordat Jean-Luc du Plessis vir die laaste kwart van die wedstryd losgelaat word.

Damian de Allende sweet Woensdag op die oefenveld in Bellville. Foto: Gallo Images

“Twintig of 25 minute sal vir eers genoeg wees vir Jean-Luc,” sê Fleck.

“Dis lekker om hom weer op die veld te sien. As jy hom in oefeninge dophou, besef jy hy het ’n ander perspektief op die spel en sien meer dikwels as nie ruimte raak. Dis ’n eienskap wat ons beslis in ons veldtog gaan nodig hê.”

Vir Fleck is die grootste doelwit Vrydag dat die Stormers “druk” op die Bolanders laai.

“Ons het verlede week gewys hoe gevaarlik die span is wanneer hy omkeerbesit afdwing. Hierdie week is die fokus hoofsaaklik daarop om die teenstander onder druk te plaas – hetsy deur besit te behou of met aggressiewe verdediging,” sê hy.

Fleck meen die Boland sal veral vroeg in die wedstryd oorgehaal wees om die Stormers op die agtervoet te kry.

“Dis altyd ’n taai wedstryd en hulle sal vir die eerste 10 tot 15 minute inklim. Dis ’n goeie geleentheid vir die Boland-spelers om teen kwaliteit-teenstanders te speel. Die skare gaan groot wees en die kwik gaan hoog styg.”

’n Maksimum temperatuur van 37 grade Celsius word Vrydag in Wellington verwag.

* Die wedstryd skop om 17:45 af.

Meer oor:  Stormers  |  Superrugby
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.