Lemoenbotter-piepkuikens met dragon-velouté

Berei vir elke gas ’n piepkuiken (petit poussin) en gee so jou gunsteling-resep vir geroosterde hoender ’n interessante kinkel.

Genoeg vir: 8

Bereidingstyd: 40 minute

Gaarmaaktyd: 40 minute

Oondtemperatuur: 200 °C

• 8 piepkuikens (sowat 350 g elk is ’n lekker porsiegrootte)

• gerasperde skil van 1 lemoen

• 45 ml vars uitgedrukte lemoensap

• 4 takkies tiemie, blaartjies gestroop

• 250 ml botter

• 3 heel knoffelbolle

• 1 lemoen, in wiggies gesny

• kappertjies vir garnering

Dragon-velouté

• 250 ml warm hoenderaftreksel

• 45 ml meel

• 250 ml pansappe

• 100 ml witwyn

• 3 takkies dragon, gekap

• 60 ml dikroom

1 Voorverhit die oond. Gebruik jou vingers om die vel van die hoenders versigtig van die borsgedeeltes los te maak. Meng die lemoenskil en -sap, tiemieblaartjies en botter en smeer dit onder die vel van die borsgedeeltes en oraloor die hoendertjies. Geur goed met sout en peper.

2 Sit die hoenders op die rakkie van ’n oondroosterpan en voeg ook die knoffelbolle en lemoenwiggies by. Oondrooster die hoender tot gaar en goudbruin; dit sal 20–40 minute neem, afhangende van die grootte. Rooster vir 10 minute met die borskante na bo. Draai die hoenders om en rooster vir nog 10 minute. Draai weer die borskant na bo. Bedruip met die pansappe en rooster vir ’n verdere 10–20 minute tot goudbruin en deurgaar. Haal die hoender uit die oond en laat dit vir 10 minute rus met die borskante na onder.

3 Maak intussen die velouté Klits die aftreksel geleidelik by die meel in ’n kastrolletjie tot glad. Bring tot kookpunt en laat prut dit vir 10 minute. Giet die pansappe uit die oondroosterpan. Skep van die vet af en klits dit dan saam met die wyn en dragon by die sous en laat dit prut tot dik en glansend. Proe vir sout en peper. Roer die room by, giet dit deur ’n siffie en sit die sous saam met die hoender voor.

Tarte Belle Hélène (sjokolade-enpeertertjies)

Sjokolade en pere is ’n wenkombinasie.

Genoeg vir: 8 individuele porsies

Bereidingstyd: 1 uur

Baktyd: 40 minute

Oondtemperatuur: 180 °C

Pâte sucrée (deeg)

• 50 g versiersuiker

• 140 g meel

• 60 g botter

• 1 ekstragroot eiergeel

• sowat 15 ml yswater

Vulsel

• 4 klein peertjies

• 500 ml edel-laatoeswyn

• 100 g botter

• 75 g bruinsuiker

• 2 eiers

• 50 g gemaalde amandels

• 100 g bruismeel

• 5 ml bakpoeier

• 30 g kakao

• 50 ml melk

1 Skil en halveer die pere vir die vulsel. Sny die pitte versigtig uit. Sit dit saam met die wyn in ’n kastrolletjie en kook dit sowat 20 minute tot die pere net sag is. Laat dit in die wyn afkoel.

2 Maak intussen die deeg Vryf die suiker en meel in die botter in tot dit soos growwe broodkrummels lyk. Voeg die eiergeel en yswater by om ’n stywe deeg te  vorm. Rol dit uit en sny 8 sirkels uit, so groot soos die bodems van die vormpies waarin jy die nagereggies gaan bak en voorsit. Laat dit vir 20 minute in die yskas rus. Bak dit dan vir 10 minute en laat effens afkoel.

3 Room die botter en suiker vir die vulsel saam. Voeg die eiers een vir een by, gevolg deur die amandels, meel, bakpoeier, kakao en melk om ’n dik beslag te vorm. Skep dit in die vormpies bo-op die deegsirkels en top elkeen met ’n peerhelfte. Bak vir 30 minute of tot gaar en uitgerys. Sit voor met vanieljeroomys en ’n stuk pralien.

Pralien

• 250 g suiker

• 250 ml water

• 50 g amandelvlokkies, liggerooster

Roer die suiker en water oor matige hitte tot al die suiker opgelos is. Laat dit kook, sonder om te roer, totdat die stroop begin karamelliseer – dit moet ’n ligte karamelkleur hê. Strooi die amandels oor ’n vel bakpapier op ’n skoon werkoppervlak. Giet die warm karamel bo-oor die amandels en beweeg die vel bakpapier sodat die karamel ’n dun lagie vorm. Pasop vir brand! Laat heeltemal afkoel en breek in stukke.

Wenke

• Kook die soetwyn wat oorgebly het nadat die pere daaruit gehaal is tot stroperig en drup dit oor die tertjies wanneer jy dit voorsit.

• In plaas van ’n bolletjie roomys, probeer ’n ovaal quenelle maak. Gebruik twee ewe groot lepels, een in elke hand. Skep roomys met die een lepel uit die ander lepel in ’n vinnige aksie om die roomys ’n netjies, driekantige ovaal vorm te gee.

Aartappels in eendvet gebraai

Gebruik botter en olie as jy nie eendvet in die hande kan kry nie.

Genoeg vir: 8

Bereidingstyd: 15 minute

Gaarmaaktyd: 1 uur

• 1,5 kg baba-aartappels, geskil

• 330 g eendvet

• growwe sout

1 Voorverhit die oond tot 200 °C met die oondroosterpan wat jy gaan gebruik, daarin. Kook die aartappels vir sowat 15 minute in soutwater en dreineer. Krap die aartappels met ’n vurk aan weerskante – dit verseker dat die aartappels lekker bros braai. Trek handskoene aan as jy bang is vir brand.

2 Haal die oondpan uit die oond en skep die eendvet daarin om solank te begin smelt. Keer die aartappels in die oondpan uit en sprei hulle uit. Oondbraai dit vir sowat 45 minute of tot goudbruin en bros. Draai die aartappels tydens die gaarmaaktyd om. Dreineer, geur met growwe sout en eet dadelik.