GEBRUIK PLAKPAPIER Gebruik jou gunsteling-foto’s om ’n treffende, nostalgiese swart-en-wit galery te skep. Jy kan plakpapier met jou gesinsfoto’s by ’n drukkery soos Art Lab laat druk.
SIT DIT OP ’N RAK Verbloem ’n saai baksteenmuur met sweefrakke, en versier dit dan na hartelus met jou versamelstukke.
MEER IS MEER! Gebruik ’n versameling pragtige spieëls en geraamde prente van vloer tot plafon, en stal jou pragtige keramiekware saam op ’n houttafel uit om tekstuur te skep.
ENIGIETS IS KUNS Gebruik mooi borde of skinkborde in verskillende kleure, groottes en vorms om ’n vaal hoekie op te vrolik.
LASLAPPIES Moenie dat oorskiet-plakpapier in die asblik beland nie! Sny stroke met komplementêre patrone uit en gerbuik dit saam vir ’n speelse voorkoms.
IN FOKUS Die kombuis is ’n fantastiese plek om ’n fokusmuur te skep wat die oog sal vang. Gebruik allerhande breekware, mooi toebehore, resepteboeke en blommerangskikkings uit jou tuin – net waarvoor jy lus het!
KUNSTIG Hou jy van ons Junie 2016-voorblad? Skep ’n kunstige fokusmuur met ’n oorgroot Tretchikoff-afdruk. Kyk net hoe indrukwekkend lyk dit! Dié plakpapier was ’n winskopie by ’n plaaslike mark, maar jy kan enige kunswerk so op plakpapier laat druk.
